
विराटनगर । प्रशिद्ध धार्मिक तीर्थस्थल खोटाङको हलेसीबाट तीर्थयात्री बोकेर फर्किदै गरेको गाडी सोमबार बिहान दुर्घटना हुँदा १ जनाको मृत्यु भएको छ ।
कोशी प्रदेशका निमित्त ट्राफिक प्रहरी प्रमुख डीएसपी सन्तोष श्रेष्ठका अनुसार दुर्घटनामा १७ जना घाइते भएका थिए । घाइतेमध्ये १ जनाको मृत्यु भएको उनले बताए । अन्य १६ जना घाइतेको घुर्मी सामुदायिक अस्पतालमा उपचार भइरहेको जानकारी श्रेष्ठले दिए ।
उनका अनुसार घाइतेमध्ये ३ जनाको अवस्था गम्भीर छ । मृतक र घाइतेको नाम खुल्न सकेको छैन । चालकसहित १८ जना सवार रहेको प्रदेश २–०१–००१ ज ००५३ नम्बरको विंगर गाडी खोटाङको हलेसी तुवाचुङ नगरपालिका–१ जयराम घाटनजिक दुर्घटनामा परेको डीएसपी श्रेष्ठले बताए ।
उनका अनुसार हलेसीबाट सिराहातर्फ जाँदै गरेको गाडी सडकबाट करिब २ सय मिटर तल खसेको प्रारम्भिक जानकारी छ । गाडी सिराहाबाट रिजर्भ लिएर खोटाङ गएको थियो । हलेसी मन्दिर दर्शनपछि रिजर्भका यात्रु बोकेर सिराहातर्फ फर्किदै गरेको गाडी दुघटनामा परेको हो ।
स्थानीयको सहयोगमा उद्धार गरेर प्रहरीले घाइतेहरुलाई उपचारका लागि घुर्मी सामुदायिक अस्पताल लगेको थियो । तीव्र गतिका कारण गाडी दुर्घटनामा परेको हुनसक्ने प्रहरीको अनुमान छ ।
दुर्घटनालगत्तै चालक फरार भएका छन् । फरार रहेका चालकको खोजी तीव्र पारेर घटनाको अनुसन्धान सुरु गरिएको प्रहरीले जनाएको छ । घटनाको थप विवरण आउन बाँकी छ ।

























