उज्यालाे पार्टीमा लागे पहिचानवादी नेता डकेन्द्रसिंह थेगिम : अब नेतृत्व छाड्ने

Share this
635shares
मुलुकी खबर
मुलुकी खबर
clock२०८२ कात्तिक २९, शनिबार १५:४३

तत्कालीन प्रदेश १ को नाम कोशी राखिएपछि पहिचानवादी पक्षधरले चरणवद्ध रुपमा आन्दोलन गरे । पहिचानवादी घटकले प्रदेश नं. १ पुनः नामांकन अभियान समितिको नेतृत्व डकेन्द्रसिंह थेगिमले गरिरहेका थिए । आन्दोलन कमजोर भएपछि थेगिम पार्टी राजनीतिमा लागेका छन् ।

थेगिम २०८१ वैशाख १५ गतेको इलामको उपनिर्वाचनमा उम्मेदवार बनेका थिए ।  मुढा चुनाव चिह्नसहित पहिचानवादीको मुद्दा लिएर उठेका उनको एजेन्डा अनुमोदन भएन । तर, थेगिमलाई पहिचानवादी नेताहरुले साथ दिए । साथ दिनेमा धरान उपमहानगरपालिकाका मेयर हर्क साम्पाङ पनि थिए । थेगिम इलाम २ मा ११ हजार ४ सय ५७ मत ल्याएर तेस्रो स्थानमा रहे ।

थेगिम र साम्पाङको सम्बन्ध सुमधुर थियो । हर्कले पार्टी खोल्दा थेगिमलाई सम्झेनन् । हर्कले नसम्झिएपछि उनी ऊर्जामन्त्री कुलमान घिसिङको उज्यालो नेपाल पार्टीमा जोडिएका छन् । उज्यालो नेपाल पार्टीमा जोडिएका थेगिम पार्टीले एजेण्डा पहिचान भएको बताउँछन् । पहिचान आन्दोलन र पार्टी यात्राका विषयमा थेगिमसँग मुलुकी खबरले गरेको कुराकानीको सम्पादित अंश : 

नयाँ पार्टीको अभियान कस्तो चलिरहेको छ ?
अहिले हाम्रो पार्टीको अभियानअन्तर्गत बैठकहरू भइरहेका छन् । हामी सबै नेता तथा कार्यकर्ताहरू मिलेर पार्टीलाई अगाडि बढाउने विषयमा छलफल गरिरहेका छौँ ।

तपाईं पहिचानवादी नेता हुनुहुन्छ, नयाँ पार्टीमा किन आबद्ध हुनुभयो ?

हामी पहिचानको मुद्दा बोकेरै यो नयाँ पार्टीमा आबद्ध भएका हौँ । यो अचम्म मान्नुपर्ने कुरा पटक्कै छैन । किनभने, यो पार्टीको विधानमा संघीयता, लोकतान्त्रिक गणतन्त्र, समावेशी समानुपातिक प्रतिनिधित्व र बहुसांस्कृतिकवादका कुराहरू स्पष्ट रूपमा समेटिएका छन् । यसले पहिचानको मुद्दालाई सम्बोधन गर्छ । पहिचान भनेको लिम्बुवान वा खम्बुवान पार्टी मात्र होइन, यो बृहत् अवधारणा हो ।

नयाँ पार्टीमा आबद्ध हुनुअघि पहिचानवादी मोर्चाका नेता र घटकहरूसँग सल्लाह भयो ? कसरी अगाडि बढ्दै हुनुहुन्छ ?

हामीले सल्लाह गरेरै अगाडि बढेका हौँ । संयुक्त पहिचानवादी मोर्चामा जो-जो घटकहरू थिए, उहाँहरूसँग परामर्श भएको छ । जस्तो कि, मैले नेतृत्व गरेको अभियान समिति, डा. महेन्द्र लावतीले नेतृत्व गरेको पहिचानवादी मोर्चा, प्रदेश नं. १ को नागरिक उन्मुक्ति पार्टीलगायतका अन्य समूहहरू छलफल भएकाे छ । यसका साथै, माओवादीकाे पहिचानवादी  माेर्चासँग पनि छलफल भयाे । सबैको सहमति र सल्लाहमा नै हामी यो नयाँ बाटोमा हिँडेका हौँ ।

पार्टीमा आबद्ध भइसकेपछि प्रदेश १ को पहिचानको मुद्दा कसरी अगाडि बढ्छ ?

पार्टीमा आबद्ध भइसकेपछि अब हामी यस विषयमा विस्तृत सल्लाह गर्छौं । पहिले पहिचानको आन्दोलन सामाजिक संघसंस्थाहरू लिम्बुवान, आदिवासी जनजाति महासंघ, शेर्पा संघ, किराँत राई याक्खाले नेतृत्व गरेका थिए । अब पार्टीमा आबद्ध भइसकेपछि यसको जिम्मेवारी तिनै सामाजिक संघसंस्थाहरूलाई उनीहरूको मापदण्ड र विधिअनुसार दिनेछौँ । राजनीतिक पार्टीहरू संघीय लोकतान्त्रिक राष्ट्रिय मञ्च, जसपा, राष्ट्रिय जनमुक्ति पार्टी, नेपाल जनमुक्ति पार्टी प्रदेश १ को नेतृत्व गर्नुपर्छ भन्ने कुरा पनि पहिला उठेको थियो, त्यसरी पनि हुन सक्छ । अब म यसको नेतृत्व हस्तान्तरण गर्ने पक्षमा छु । म यो जिम्मेवारीलाई अरूलाई हस्तान्तरण गर्न चाहन्छु ।

पहिचानवादी आन्दोलन सेलाएको छ नि ?

असार साउनको खेतीपाती, जेन्जी आन्दोलन, त्यसपछि दसैँ तिहारको चाडपर्वकाे कारणले आन्दोलन रोकिएको जस्तो देखिएको हो । तर, पहिलेदेखि नै आन्दोलन केही सुस्त भएको थियो । जेन्जी आन्दोलनअघि मैले एउटा अन्तरधार्मिक राष्ट्रिय गोष्ठी सम्मेलन काठमाडौँमा सम्पन्न गरेको थिएँ, जुन पहिचानको आन्दोलनअन्तर्गत नै पर्थ्यो । त्यसपछि थप कार्यक्रम गर्ने योजना थियो, तर जेन्जी आन्दोलन भयो । त्यसपछि ६ महिनाको सरकार बन्यो र उपनिर्वाचनको समयमा स्वतन्त्र रूपमा भाग लिन सम्भव नभएकाले पार्टी निर्माण गर्ने कुराले मेरो गतिविधिलाई प्रभाव पारेको हो । अब नयाँ पार्टीमार्फत हामी पुनः सक्रिय हुनेछौँ ।

पार्टी निर्माण गर्ने क्रममा  हर्क साम्पाङसँग सल्लाह भयो कि भएन ?

उपनिर्वाचनमा हर्क साम्पाङले सहयाेग गर्नुभयाे । उपनिर्वाचनपछि केही समय अन्तरसंवाद भइराखेको थियो । तर, बीचमा ‘कम्युनिकेशन ग्याप’ भयो । उहाँ निकै व्यस्त भएकाले फोन लागेन वा उठाउन भ्याउनु भएन । मैले उहाँसँग जोडिन निकै प्रयास गरेँ, तर उहाँबाट सकारात्मक प्रतिक्रिया पाइनँ । उहाँ पार्टी निर्माणका लागि काठमाडौँ आउनुभएको जानकारी पनि मैले उहाँबाट नभई अरूबाट पाएको थिएँ । उहाँका कार्यकर्ताहरूको कमजोरी पनि हुन सक्छ, किनकि उहाँ देशभरिका नगरपालिकामा पार्टी स्थापना गर्न व्यस्त हुनुहुन्थ्यो । यस कारण हामीबीच अपेक्षित समन्वय हुन सकेन ।

हर्क साम्पाङसँग भोलि कार्यगत एकता हुने सम्भावना छ कि छैन ?

कार्यगत एकताको सम्भावना एकदमै छ । मैले सम्मानजनक मत प्राप्त गर्नमा उहाँको ठूलो योगदान छ । हामी ४१ घटक राजनीतिक पार्टी र सामाजिक संघसंस्थाहरू थियौँ, सबैको योगदान छ र त्यसमा उहाँको योगदान ‘प्लस’ हो । म उहाँप्रति सधैँ कृतज्ञ छु । मेरो विचारमा आगामी दिनमा सहकार्य, गठबन्धन र मोर्चाबन्दी हुन्छ । मेरो व्यक्तिगत धारणा के हो भने, कुलमान घिसिङजस्ता देशभक्त, राष्ट्रवादी र देशको उन्नति चाहने व्यक्ति तथा हर्क साम्पाङजस्ता श्रम संस्कृति विकास गर्ने र कुनै आरोप नलागेका साथीहरू एक भएर जानुपर्छ । एक भएर चुनाव लड्नुपर्छ, नभए पनि कम्तीमा सहकार्य वा मोर्चाबन्दी गरेर चुनाव लड्न सक्ने वातावरण तयार गर्नुपर्छ भन्ने सोच राखिएको छ ।

नयाँ पार्टी भर्खरै गठन भएको छ, यसले संघीयता र पहिचानका मुद्दाहरूमा आधिकारिक धारणा कहिले सार्वजनिक गर्छ ?

हाम्रो पार्टीको विधान लगभग तयार भइसकेको छ । यसमा संघीय लोकतान्त्रिक गणतन्त्रलाई सुदृढ बनाउने, सामुदायिक समाजवाद, बहुसांस्कृतिकतावाद र समतामूलक समाज निर्माण गर्ने भन्ने कुराहरू आएका छन् । यी सबै कुराहरू विधानमा परेपछि सबै मुद्दाहरू समेटिएको मैले महसुस गरेको छु ।  यो नै हाम्रो आधिकारिक धारणा हुनेछ ।

तपाइको प्रतिक्रिया
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
© 2024 Muluki Khabar. All Rights Reserved. Design & Develop By: Indesign Media Pvt. Ltd.