
विराटनगर । सुनसरीमा सशस्त्र प्रहरीको गोली लागेर एक व्यक्तिको मृत्यु भएको घटनामा संलग्न रहेको आशंकामा सशस्त्र प्रहरीका वरिष्ठ हवल्दार नवराज खतिवडालाई प्रहरीले नियन्त्रणमा लिएर सोधपुछ सुरु गरेको छ । जिल्ला प्रहरी कार्यालय सुनसरीका एसपी केशवकुमार थेवेका अनुसार हवल्दार खतिवडा बिहीबारदेखि नै प्रहरीको सम्पर्कमा छन् । उनीसँग घटनाका बारेमा विस्तृत सोधपुछ भइरहेको छ ।
बुधबार मध्यराति सुनसरीको कोशी गाउँपालिका–१ मा १० बोरा चिनी बोकेको अटो रिक्सालाई नियन्त्रणमा लिने क्रममा सशस्त्र प्रहरीले गोली चलाएको थियो । सोही क्रममा स्थानीय ४५ वर्षीय विजय साहको छातीमा गोली लागी मृत्यु भएको थियो। घटनापछि सशस्त्र प्रहरीले तस्करको समूहले सुरुमा आक्रमण गरेको र जवाफी कारबाहीमा गोली चलाउनुपरेको दाबी गर्दै आएको छ ।
यद्यपि, १० बोरा चिनीका लागि ज्यान नै लिने गरी गोली चलाइएको भन्दै स्थानीयले विरोध गरिरहेका छन् । घटनाको सत्यतथ्य पत्ता लगाउन छानबिन समिति गठन गरिएको छ भने प्रहरीले दोषी ठहरिए कानूनी प्रक्रिया अगाडि बढाउने जनाएको छ ।

























