
काठमाडौँ । प्रधानमन्त्री सुशीला कार्कीका श्रीमान् दुर्गा प्रसाद सुवेदी स्वास्थ्यमा समस्या देखिएपछि त्रिभुवन विश्वविद्यालय शिक्षण अस्पताल महाराजगञ्जमा भर्ना भएका छन्। स्वास्थ्यमा विभिन्न जटिलता देखिएपछि उनलाई बिहीबार अस्पताल पुर्याइएको हो।
सुवेदीमा पिसाबको संक्रमण र शरीरमा नुनको मात्रा कम हुने (सोडियम लेभल घट्ने) जस्ता समस्या देखिएका छन्। उपचारमा संलग्न एक चिकित्सकका अनुसार उनलाई रिंगटा लाग्ने समस्या पनि देखिएको छ। यसअघि प्रोस्टेटको शल्यक्रिया गराएका सुवेदीमा अहिले पुनः संक्रमणका कारण स्वास्थ्यमा समस्या आएको बताइएको छ।
हाल उनलाई अस्पतालको क्याबिनमा राखेर विशेषज्ञ चिकित्सकहरूको टोलीले उपचार गरिरहेको छ। प्रधानमन्त्री निकट स्रोतका अनुसार उनको अवस्था स्थिर रहेको र थप उपचारका लागि चिकित्सकहरूसँग निरन्तर परामर्श भइरहेको छ।

























