दुर्गा प्रसाईंको बीएन्डसीलाई ५० कोटा

झापा । चिकित्सा शिक्षा आयोगले दुर्गा प्रसाईँको बीएन्डसी मेडिकल कलेज टिचिङ एन्ड रिसर्च प्रालिलाई चिकित्साशास्त्रको स्नातक तह (एमबीबीएस)मा ५० जनाको सिट दिएको छ । आयोगले पहिलो पटक बिएन्डसीलाई ५० जना विद्यार्थी पढाउने अनुमति दिएको हो ।

आयोगको अनुमति पछि यसै शैक्षिक शत्रबाट ५० जना विद्यार्थी पढाउने कलेजका जनसम्पर्क अधिकृत प्रमिश गिरीले बताए । आयोगले शुक्रबार नै सिट निर्धारणबारेमा सार्वजनिक सूचना जारी गरिसकेको छ ।

विर्तामोड नगरपालिका वडा नं. ५ विर्तामोडमा चिकित्साशास्त्रको स्नातक तहमा अध्यापन गराउने उद्देश्यले विसं २०७१ फागुन १८ गतेदेखि ३०० शय्याको अस्पतालसहित बीएन्डसी मेडिकल कलेज टिचिङ एन्ड रिसर्च प्रालि सञ्चालनमा आएको थियो ।

नेपाल सरकारबाट २०६४ सालमै मनसाय पत्र प्राप्त गरेको बिन्डसीले एमबीबीएस पढाउनका लागि सम्पूर्ण पूर्वाधार स्थापना गरिसकेपछि पनि अध्यापनको स्वीकृति पाएको थिएन् । अध्यापनका लागि लामो अवधि कुर्नु परेको जनसम्पर्क अधिकृत गिरीले बताए ।

सर्वोच्च अदालतले विसं २०८० चैत्र १३ गते बीएन्डसी मेडिकल कलेजलाई सम्बन्धन दिनका लागि परमादेश जारी गरेको थियो । सोही परमादेशका आधारमा काठमाडौं युनिभर्सिटीले सम्बन्धन प्रदान गरेको हो ।

बीएन्डसी मेडिकल कलेज टिचिङ एन्ड रिसर्च प्रालिका प्रिन्सिपल प्राडा उमेश शर्माले सम्पूर्ण पूर्वाधार तयार रहेको जनाउँदै अब छिट्टै एमबीबीएसका विद्यार्थीको भर्ना र पठनपाठन सुरु हुने बताए ।

विर्तामोडमा सुविधासम्पन्न अस्पताल सञ्चालन र मेचीनगर–११ धाइजनमा पठनपाठनका लागि पूर्वाधारयुक्त साइन्स बेसिक भवन स्थापना भइसकेको प्राडा शर्माले जानकारी दिए ।