ओमानसँग पनि पराजित भयाे नेपाल

Share this
720shares
मुलुकी खबर
मुलुकी खबर
clock२०८१ असोज ३, बिहीबार ०६:२५

विराटनगर । क्यानडामा जारी आइसिसी विश्वकप क्रिकेट लिग– २ को त्रिकोणात्मक सिरिजको दोस्रो खेलमा पनि नेपाल पराजित भएको छ । ओमानसँग १ विकेटले पराजित भएको हो । लिगमा नेपालको यो पाँचौं हार हो ।

नेपाल, ओमान र क्यानडाबीच जारी सिरिजमा नेपालले अघिल्लो खेलमा घरेलु टोलीसँग पनि हार बेहोरेको थियो।

बिहीबार नेपालले दिएको २२१ रनको लक्ष्य ओमानले अन्तिम बल बाँकी छदा ९ विकेटको क्षतिमा पूरा गर्दै रोमाञ्चक जित निकाल्यो ।

अन्तिम दुई ओभरमा ओमानलाई १० रन चाहिएको थियो भने एक विकेट मात्र बचेको थियो ।

क्यानडाको ओन्टेरियोस्थित किंग सिटीको मेपल लिफ नर्थ–वेस्ट मैदानमा ओमानले टस जितेर फिल्डिङ रोजेपछि पहिले ब्याटिङ गरेको नेपालले ९ विकेटको क्षतिमा २२० रन जोड्यो।

नेपालका लागि कप्तान रोहितकुमार पौडेलले ६० रन जोडे। उनले ७२ बल खेल्दा २ चौका र ४ छक्का प्रहार गरे। यस्तै गुल्सन झाले ३५ बलमा ५३ रनको योगदान दिए । सोमपाल कामीले ८ बलमा २ छक्का प्रहार गर्दै जोडेको २० रनले नेपालले २ सय रन कटायो ।

नेपालले खेलमा सुरुवात भने राम्रो गर्न सकेन । कुशल भुर्तेलको स्थानमा ओपनिङको मौका पाएका अर्जुन साउदले ५ रन मात्र जोड्न सके । अर्का ओपनर आसिफ शेख ११ रनमा आउट भए । भीम सार्कीले पनि ११ रन मात्र जोड्न सके।

आरिफ शेखले ८८ बल खेल्दा ३५ रन बनाउन सके । अनिलकुमार साहले ३ रन जोडेर आउट भए। सन्दीप लामिछाने ११ रन र करण केसी १ रन जोडे ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.