
विराटनगर । मोरङको बेलबारी नगरपालिकाको लक्ष्मीमार्गमा आजदेखि सुरु हुनुपर्ने सातौं बेलबारी आरजु राइस अन्तर्राष्ट्रिय आमन्त्रण गोल्डकप फुटबल प्रतियोगिता स्थगित भएको छ ।
आजदेखि हुने भनिएको गोल्डकप निरन्तरको वर्षाका कारण स्थगित गर्नुपरेको आयोजक एलएक्स सिटी फुटबल क्लबले जनाएको छ ।
वर्षा अझ केही दिन हुनसक्ने मौसम विज्ञहरुले सूचना जारी गरेका कारण खेलका सम्पूर्ण कार्यक्रम स्थगिता गर्नुपरेको क्लबका अध्यक्ष विक्रम राईले जानकारी दिए ।
उनले आजै क्लबका पदाधिकारी र एन्फाका प्रतिनिधिबीच छलफल हुँदा मौसम प्रतिकूल नभएकाले हाललाई प्रतियोगिताका सम्पूर्ण कार्यक्रम स्थगित गर्ने निर्णय भएको बताए ।
केही दिन ढिलो गरी प्रतियोगिता गर्दा दसैं पर्ने भएकाले एन्फासँग समन्वय गरेर चाँडै अर्को खेल तालिका सार्वजनिक गर्ने अध्यक्ष राईले बताए ।



















