नवराज अर्याल र ऋषि धमला ।काठमाडौं । कञ्चनपुरकी निर्मला पन्त हत्या प्रकरण आफू प्रत्यक्षदर्शी भएको भन्दै एउटा टेलिभिजनमा अन्तर्वार्ता दिएका एक व्यक्तिलाई प्रहरीले पक्राउ गरेको छ ।
गोरखाका नवराज अर्याललाई पक्राउ गरिएको नेपाल प्रहरीको केन्द्रीय अनुसन्धान ब्युरो (सीआईबी)का एसपी होविन्द्र बोगटीले जानकारी दिए । उनका अनुसार गलत विवरणसहित दुष्प्रचार गरेको आरोपमा अर्याललाई नियन्त्रणमा लिएर थप सोधपुछ गर्ने काम भइरहेको छ ।
अर्यालले ऋषि धमलाको प्राइम टेलिभिजनमा अन्तर्वाता दिँदै आफू निर्मला पन्त हत्या प्रकरणको प्रत्यक्षदर्शी भएको बताएका थिए । आफूले निर्मला पन्त घटना प्रत्यक्ष देखेको दाबी गरेका उनीसँग सीआईबीले मंगलबार सोधपुछ गरेको थियो ।
उनले आफूले घटना प्रत्यक्ष देखेको र घटनामा तीनजना संलग्न रहेको दाबी गरेका थिए । अन्तर्वार्ता सार्वजनिक भएसँगै सीआईबीले उनलाई सोधपुछ गरेको थियो । प्रहरीका अनुसार सोधपुछका क्रममा अर्यालका कुरा विश्वास गर्न लायक थिएनन् ।
उनको मानसिक अवस्था ठीक नभएको अनुमान प्रहरीको थियो । अर्यालले सोधपुछका क्रममा घटनामा संलग्न रहेका दाबी गरेका तीन जनाको नाम पनि लिएका थिए । तर, उनले नाम दिएका व्यक्ति असम्बन्धित रहेको सीआईबीले जनाएको छ ।
गाडीमा हिँडेको बेला घटना देखेको उनले बताएका थिए । प्रहरीका अनुसार घटनाको प्रकृतिसँग उनको बयान मेल खाँदैन । टेलिभिजन अन्तर्वार्ताको दाबी झुटो रहेको एसपी बोगटीले बताए ।
अर्यालले आफूलाई खानेपानी विभागको सवारी चालकका रुपमा चिनाएका थिए । कञ्चनपुर पुगेको बेला निर्मलाको बलात्कार हुँदै गरेको देखेको विवरण उनले अन्तर्वार्तामा सुनाएका हुन् ।
अर्यालकी पत्नीसहित अन्तर्वार्ता लिने टेलिभिजन कार्यक्रम प्रस्तोता ऋषि धमलालाई पनि सीआईबीले बोलाएको छ । यस प्रकरणमा धमलामाथि सोधपुछ हुने सीआईबीका एक अधिकारीले बताए ।

























