गाडीमा सरकारी नम्बर प्लेट राखेर गाँजा तस्करी, गोली हानेर ६९० किलो बरामद

Share this
718shares
मुलुकी खबर
मुलुकी खबर
clock२०८१ मंसिर १९, बुधबार ११:५९

विराटनगर । लागुऔषध गाँजाको ओसारपसार र कारोबारमा संलग्न गिरोहले यसको तस्करीका लागि नयाँ–नयाँ शैली अपनाउन थालेका छन् ।

गिरोहले स्कोरपिओ गाडीमा सरकारी नम्बर प्लेट राखेर गाँजा तस्करी गर्ने गरेको पाइएको छ । प्रहरीले गोली प्रहार गरेर सरकारी नम्बर प्लेट लगाइएका दुईवटा गाडीलाई सुनसरीको धरान उपमहानगरपालिका–१३ अमरहाटबाट मंगलबार साँझ नियन्त्रणमा लिएको छ ।

धनकुटाबाट धरानतर्फ आउँदै गरेका स्कोरपिओलाई नियन्त्रणमा लिने क्रममा प्रहरीले इन्सास राइफलबाट ४ राउण्ड गोली प्रहार गरेको थियो । गोली हानेर गाँजा लोड गरिएका बा १ झ ४६०५ र बा १ झ ५१२७ नम्बरका दुईवटा गाडी नियन्त्रणमा लिइएको कोशी प्रदेश प्रहरी कार्यालय विराटनगरका प्रवक्ता एसएसपी भीमबहादुर दाहालले जानकारी दिए ।

सरकारी गाडीमा राखेर गाँजा ओसारपसार भइरहेको विशेष सूचना प्राप्त हुनसाथ नियन्त्रणमा लिन साँझ ७ बजेतिर इलाका प्रहरी कार्यालय धरानका डीएसपी प्रकाश जबेगूसमेतको टोली खटिएको थियो । सवारीसाधनहरु चेकजाँच गर्ने क्रममा सरकारी नम्बर प्लेट राखिएको ५१२७ नम्बरको गाडीलाई चालकले भगाएका थिए ।

प्रहरीले गोली प्रहार गरेपछि भागेको उक्त गाडी धरान–१३ को सूर्य मार्गमा छाडेर चालक फरार भएको एसएसपी दाहालले बताए । गाडीलाई भने प्रहरीले नियन्त्रणमा लिएको छ । चालक फरार रहेकाले खोजी भइरहेको प्रहरीले जनाएको छ ।

त्यस्तै, सरकारी नम्बर प्लेट राखिएको अर्को ४६०५ नम्बरको गाडीलाई भने प्रहरीले चालकसहित नियन्त्रणमा लिएको छ । चालक मोरङको सुन्दरहरैँचा नगरपालिका–११ का ३६ वर्षीय श्यामकुमार विश्वकर्मा पक्राउ परेको जानकारी दाहालले दिए ।

उनका अनुसार दुवै गाडी चेकजाँच गर्दा ६ सय ९० किलो गाँजा बरामद भएको छ । प्रहरीको गोली प्रहारबाट ५१२७ नम्बरको गाडीको पछाडिको भागमा क्षति पुगेको र घटनामा मानवीय क्षति नभएको दाहालको भनाइ छ ।

‘गाडीमा सरकारी नम्बर प्लेट राखेर गाँजाको ओसारपसार गर्ने गरेको पाइयो । प्रहरीले निगरानी नगर्ने ठानेर त्यसो गरेजस्तो देखिन्छ,’ उनले भने । गाडीमा सरकारी नम्बर प्लेट मात्रै राखिएको र दुवै गाडी सरकारी नभएको प्रारम्भिक अनुसन्धानबाट खुलेको जानकारी दाहालले दिए ।

‘गाडी सरकारी हुन कि हैनन् भनेर विभिन्न कोणबाट विश्लेषण भइरहेको छ । हालसम्मको अनुसन्धानबाट गाडी सरकारी नभएको पाइयो । यद्यपि, थप अनुसन्धानपछि मात्रै वास्तविकता पत्ता लाग्छ,’ एसएसपी दाहालले भने । उनका अनुसार बरामद भएको गाँजासहित दुवै गाडी र पक्राउ परेका एक जना चालकलाई इलाका प्रहरी कार्यालय धरानमा राखेर अनुसन्धानको थप प्रक्रिया अघि बढाइएको छ ।

तपाइको प्रतिक्रिया
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
© 2024 Muluki Khabar. All Rights Reserved. Design & Develop By: Indesign Media Pvt. Ltd.