
काठमाडौं । नेपाल प्रिमियर लिग (एनपीएल)मा सातौं दिनको दोस्रो खेलमा कर्णाली याक्स विजयी भएको छ । कर्णाली याक्सले विराटनगर किंग्सलाई ७ रनले पराजित गरेको हो ।
कीर्तिपुरस्थित टियूको खेलमा मैदानमा भएको खेलमा टस जितेर विराटनगरले पहिलो बलिङ रोज्दै कर्णालीलाई पहिलो ब्याटिङको निम्तो दिएको थियो ।
पहिलो ब्याटिङ थालेको कर्णालीले निर्धारित २० ओभरमा सबै विकेट गुमाउँदै १ सय ३३ रनको योगफल तयार पार्यो । विलियम बोसिस्टोल ६६ रन र देव खनालले ५३ रन बनाए भने अन्य कुनै पनि खेलाडीले दोहोरो अंक जोड्न सकेनन् ।
बलिङमा विराटनगरका प्रतिस जिसीले ४, बसिर अहमद, क्रिस सोलले समान २ तथा अकिब इल्यासले १ विकेट लिए ।
१ सय ३४ रनको विजयी लक्ष्यका साथ मैदानमा उत्रेको विराटनगरले २० ओभरमा ८ विकेट गुमाउँदै १ सय २६ रनमै समेटियो । निकोलस कीर्तन ४० रन, लोकेश बमले १९ रन र दीपक बोहोरले १८ रन बनाए ।
बलिङमा कर्णालीका नन्दन यादवले ३, विपिन शर्माले २, सोमपाल कामी, विलियम बासिस्टो र युनिश ठकुरीले समान १ विकेट लिए ।

























