
झापा । कोशी प्रदेशमा चालु आर्थिक वर्षको साउनदेखि मङ्सिर मसान्तसम्ममा तीन हजार चार सय ९८ वटा सवारी दुर्घटना भएको छ ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका अनुसार सबैभन्दा बढी मोटरसाइकल दुर्घटना भएको छ । पाँच महिनाको अवधिमा दुई हजार ९२ मोटरसाइकल दुर्घटनाका घटना भएका छन् ।
पूर्वपश्चिम राजमार्गमा एसियन हाइवेको स्तरोन्नति कार्य भइरहेको अवस्थामा जेब्रा क्रसिङ र सवारी सङ्केतको अभावमा पनि मोटरसाइकल दुर्घटना बढेको हो ।
सवारी दुर्घटनामा परी पाँच महिनाको अवधिमा एक सय ९१ जनाको मृत्यु भएको छ । तीन सय २७ जना गम्भीर घाइते भएकाे कार्यालयका सूचना अधिकारी रामेश्वर ट्वाटीले बताए ।

























