
काठमाडौं । पेट्रोल, डिजेल र मट्टीतेलको मूल्य बढेको छ । नेपाल आयल निगम लिमिटेडले पेट्रोलमा प्रति लिटर २, डिजेल र मट्टीतेलमा प्रति लिटर ३ रुपैयाँ मूल्य बढाएको हो ।
इन्डियन आयल कर्पोरेसनबाट पेट्रोलियम पदार्थको नयाँ खरिद मूल्य अनुसार प्रति लिटर पेट्रोलमा २ रुपैयाँ २४ पैसा र डिजेलमा ३ रुपैयाँ ५५ पैसा बढेर आएको निगमले जनाएको छ ।
मूल्य वृद्धिसँगै १६० रुपैयाँ ५० पैसा प्रति लिटर (पहिलो वर्ग) पेट्रोलको मूल्य १६२ रुपैयाँ ५० पैसा पुगेको छ । दोस्रो वर्ग अन्तर्गत १६२ रुपैयाँ पर्ने प्रतिलिटर पेट्रोलको मूल्य १६४ रुपैयाँ पुगेको छ । तेस्रो वर्ग अनुसार १६३ रुपैयाँ पर्ने पेट्रोलको मूल्य १६५ रुपैयाँ पुगेको छ ।
प्रतिलिटर १५० रुपैयाँ ५० पैसा (पहिलो वर्ग) पर्ने डिजेलको मूल्य १५३ रुपैयाँ ५० पैसा पुगेको छ । दोस्रो वर्गमा १५२ रुपैयाँ पर्ने प्रतिलिटर डिजेल १५५ रुपैयाँ र तेस्रो वर्गमा १५३ रुपैयाँ पर्ने डिजेल १५६ रुपैयाँ पुगेको छ । र मट्टीतेलको मूल्य पनि डिजेलको बराबर छ ।


























