जोगवनी–किमाथांका सडकको ‘ब्रेक थ्रु’

Share this
791shares
मुलुकी खबर
मुलुकी खबर
clock२०८१ माघ १४, सोमबार १९:२१

विराटनगर । जोगवनी नाकादेखि संखुवासभाको किमाथांका हुँदै चीन जोड्ने सडकको सोमबार ‘ब्रेक थ्रु’ गरिएको छ ।

कोशी राजमार्गअन्तर्गत संखुवासभाको सदरमुकाम खाँदबारीदेखि चीनसँग सीमा जोडिएको किमाथांका नाकासम्मको १ सय ५८ किलोमिटर सडकको ‘ट्रयाक’ खोल्ने काम सम्पन्न भएसँगै संघीय सरकारका ३ जना मन्त्रीको उपस्थितिमा ‘ब्रेक थ्रु’ गरिएको हो । खाँदबारी–किमाथांका सडकअन्तर्गत च्याम्ताङदेखि घोङघोप्पासम्मको साढे १० किलोमिटर सडकको चट्टानसहितको भिर नेपाली सेनाले फुटाएर ‘ट्रयाक’ खोलेको हो ।

सडकको भोटखोला गाउँपालिका–१ च्याम्ताङमा संखुवासभाका प्रतिनिधिसभा सदस्य एवं ऊर्जा, जलस्रोत तथा सिँचाइमन्त्री दीपक खड्का, रक्षामन्त्री मानवीर राई र भौतिक पूर्वाधार तथा यातायातमन्त्री देवेन्द्र दाहालको उपस्थितिमा ‘ब्रेक थ्रु’ गरिएको छ । सडकको ‘ब्रेक थ्रु’सँगै भारतदेखि चीनसम्म जोड्ने कोशी राजमार्गअन्तर्गतको सडक स्तरोन्नतिको काम हुनेछ ।

सडकको ‘ब्रेक थ्रु’का लागि मन्त्री खड्काले निरन्तर पहल गर्दै आएका थिए । गत पुस १२ गते रक्षामन्त्री राई र निर्माणमा संलग्न नेपाली सेनाको टोलीलाई भेटेर सडक चाँडो सम्पन्न गर्न ध्यानाकर्षण गराएका थिए ।

मन्त्री खड्काले खाँदबारी–किमाथांका सडक जोडिएसँगै त्रिदेशीय पारवहनमा सहजता हुने बताए । त्रिदेशीय नाका जोड्ने उक्त सडक सञ्चालनमा आएपछि नेपाल–भारत र चीनका साथै बंगलादेशले फाइदा लिनसक्ने उनको भनाइ छ ।

सडक स्तरोन्नतिका लागि आवश्यक बजेट विनियोजन गर्न मन्त्री खड्काले भौतिक पूर्वाधार मन्त्रालयलाई आग्रह गरेका छन् । किमाथांका क्षेत्र हुँदै अरुण नदीको बहाव रहेकाले उक्त क्षेत्रमा अन्य जलविद्युत आयोजना निर्माण गर्न सकिने उनको भनाइ थियो ।

रक्षामन्त्री राईले नेपाली सेनाद्वारा निर्माण भइरहेको सडक मुलुकको विकासमा महत्वपूर्ण पूर्वाधारका रूपमा रहेको बताए । उनले समयअगावै सडकको ‘ट्रयाक’ खोल्ने काम सम्पन्न गरेकोमा नेपाली सेनालाई धन्यवाद दिए । पूर्वको किमाथांका नाका, पश्चिमको हिल्सा नाका र केरुङ नाकालाई सरकारले प्राथमिकतामा राखेको जानकारी मन्त्री राईले दिए । उनले बाँकी काम सेनाले चाँडो सम्पन्न गर्नुपर्ने बताए ।

भौतिक पूर्वाधार तथा यातायातमन्त्री दाहालले उक्त सडकखण्डको बाँकी काम सम्पन्न गर्न आवश्यक बजेट अभाव हुन नदिने बताए । उनले सडकखण्डमा पर्ने पुल निर्माणका लागि सरकारले आवश्यक बजेट विनियोजन गर्ने उल्लेख गरे ।

भोटखोला गाउँपालिकाका अध्यक्ष वाङछेदर भोटेले सडक निर्माणले भोटखोलाको आर्थिक विकासमा सहयोग पुग्ने बताए । सडकको ‘ब्रेक थ्रु’सँगै संखुवासभा र उत्तरी भोटखोलासहित सिंगो मुलुकका लागि सुनौलो दिनको सुरुवात भएको उनको भनाइ छ ।

‘ब्रेक थ्रु’ कार्यक्रममा आफूले गरेको कामको प्रगतिबारे नेपाली सेनाले जानकारी गराएको थियो । सेनाले सडक निर्माणका लागि बजेट अपुग रहेको भन्दै बजेट सुनिश्चित गरे सडक चौडाइको काम चाँडो सम्पन्न गर्न सकिने जनाएको छ ।

२०७६ साल भदौ २२ गतेको मन्त्रिपरिषद् बैठकले नेपाली सेनालाई सडकको ‘ट्रयाक’ खोल्न दिने निर्णय गरेको थियो । त्यसपछि सेनाले विस्फोटक पदार्थको प्रयोग गरेर कडा चट्टान फोर्न थालेको हो ।

तपाइको प्रतिक्रिया
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
विराटनगरमा राति २ बजेसम्म व्यवसाय खोल्न पाइने, अनुमति प्रक्रिया सुरु
भारतीयका परिवार नै मिलेर नेपालमा लागुऔषध ‘सप्लाई’ : मोरङको रंगेलीबाट बुवा, आमा र छोरा पक्राउ
© 2024 Muluki Khabar. All Rights Reserved. Design & Develop By: Indesign Media Pvt. Ltd.