बुढासुब्बा गोल्डकप: भुटान सेमिफाइनलमा 

Share this
718shares
मुलुकी खबर
मुलुकी खबर
clock२०८१ माघ २१, सोमबार १८:२२

धरान । इटहरीविरुद्ध सानदार जित निकाल्दै भुटानको रोयल थिम्पु कलेज २५ औं अन्तर्राष्ट्रिय आमन्त्रण बुढासुब्बा गोल्डकप प्रतियोगिताको सेमिफाइनलमा प्रवेश गरेको छ । 

भुटान प्रिमियर लिग खेल्ने टोली रोयल थिम्पुले इटहरीको राष्ट्रिय जागृती क्लबलाई ४–१ गोल अन्तरले पराजित गर्दै अन्तिम ४ मा स्थान पक्का गरेको हो । सेमिफाइनलमा भुटानले चर्च ब्वाइज युनाइटेडसँग खेल्ने छ । 

भुटानले खेलको ७ औं मिनेटमै अग्रता लिएको थियो । नोयेदा योसेलको पासमा सोनाम योसेले गोल गर्दै टोलीलाई अग्रता दिलाए । पहिलो हाफमा १–० ले अग्रता बनाएको भुटानले दोस्रो हाफमा थप ३ गोल गर्यो । 

दोस्रो हाफको ७ औं मिनेटमा सोनाम जुग्द्रुलले गोल गरे । इटहरीको डिबक्स एरियामा डिफेन्सले क्लियर गर्न नसकेको बललाई सोनामले दोस्रो बार च्याप्दै जाली चुमाए ।

दोस्रो हाफकै १४ औं मिनेटमा कर्मा जम्सोले गोल थप्दै टोलीलाई ३–० को स्थितिमा पुर्याए । कर्माले प्रहार गरेको बल इटहरीका गोलकिपर सन्दीप लिम्बूले नियन्त्रणमा लिन नसक्दा बलले गोल लाइन क्रस गरेको थियो । 

दोस्रो हाफको २५ औं मिनेटमा सोनाम योसेको पासमा नयन्दा योसेनले गोल गर्दै टिमको जित निश्चित गरे । खेलको म्यान अफ द म्याच भुटानका सोनाम योसेले नगद १० हजार पुरस्कार प्राप्त गरे । 

३ विदेशी खेलाडीसहित मैदानमा उत्रिएको इटहरी भुटानको तुलनामा शारीरिक रुपमा बलियो देखिन्थ्यो । मैदानमा भुटानका युवा खेलाडी इटहरीभन्दा टेक्निकल्ली राम्रो खेल प्रदर्शन गरे ।

दोस्रो हाफको ३२ औं मिनेटमा इटहरीका आलेक्सले सान्त्वना गोल फर्काए । उनले विपक्षी गोलकिपरलाई फ्लीक गर्दै गोल गरे ।  मंगलबारको अन्तिम क्वाटरफाइनल खेल साबिकको विजेता काठमाडौंको न्यूरोड टिम (एनआरटी) र काँकडभिट्टा फुटबल ट्रेनिङ सेन्टरबीच खेल हुनेछ । 

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.