मोरङमा पाठेघर मुखको क्यान्सरविरुद्धको एचपीभी खोप अभियान सुरु

विराटनगर । पाठेघरको मुखको क्यान्सरविरुद्ध लगाइने ‘ह्युमन प्यापिलोमा भाइरस (एचपीभी)’ खोप अभियान मोरङमा बुधबार (आज)बाट सुरु भएको छ । 

पहिलो चरणमा आजबाट र दोस्रो चरणमा माघ २७ गतेबाट एचपीभी खोप अभियान लगाइने छ । मोरङको बेलबारी नगरपालिका–५  मा रहेको धनपाल मावि कसेनीका विद्यार्थीहरूलाई खोप लगाएर अभियान सुरुको सुरुवात गरिएको हो । 

मोरङमा ६ देखि कक्षा १० सम्म अध्ययनरत १० देखि १४ वर्ष उमेर समूहका ६१ हजार १ सय ७ जना किशोरीहरूलाई एचपीभी खोप लगाउने लक्ष्य रहेको छ ।

खोप अधिकृत उत्सव पोखरेलले पहिलो चरणमा माघदेखि २३ गतेदेखि विराटनगर महानगरपालिका, लेटाङ, बेलबारी, सुन्दरहरैँचा, मिक्लाजुङ, बूढीगंगा, ग्रामथान, केराबारीमा खोप लगाउन सुरु गरिएको जानकारी दिए । 

त्यसैगरी, माघ २७ गतेबाट पथरीशनिश्चरे, उर्लाबारी, सुनबर्षी, रंगेली, रतुवामाई, कानेपोखरी, धनपालथान, जहदा र कटहरीमा खोप अभियान सुरु हुने पोखरेलले बताए ।

विद्यालयको खोप केन्द्रहरूबाट ५० हजार ५ सय ९७ जना किशोरीहरूलाई खोप लगाउने लक्ष्य लिइएको छ । 

यस्तै, विद्यालय नजाने १० देखि १४ वर्ष उमेर समूहका १० हजार ५ सय १० जना किशोरी छन् । उनीहरूलाई समुदायस्तरमा स्थापना गरिएको खोप केन्द्रबाट खोप लगाइने छ । 

मोरङमा ६ सय १३ विद्यालयमा खोप केन्द्र, १ सय ६४ स्वास्थ्य संस्था केन्द्र, ७७ समुदायस्तरमा गरी जम्मा ८ सय ५४ खोप केन्द्रहरूबाट किशोरीहरूलाई खोप दिँदैछ । 

सरकारले किशोरीलाई सानै उमेरबाट नै क्यान्सरबाट जोगाउन खोप अभियान सञ्चालन गरेको हो । नेपालमा सबैभन्दा बढी महिलामा लाग्ने क्यान्सरमध्ये पाठेघरको मुखको क्यान्सर र स्तन क्यान्सर रहेको छ ।