
विराटनगर । इटहरी उपमहानगरपालिकामा उपप्रमुखले लगाएको ताला पालिका प्रमुखले फुटाएका छन् । गत माघ ११ गते उपप्रमुख संगीता चौधरीसहित एमालेबाट निर्वाचित वडाध्यक्षहरुले प्रशासन प्रमुख संजिव खड्काको कार्यकक्षमा तालाबन्दी गरेका थिए । १२ दिनपछि पालिका प्रमुख हेमकर्ण पौडेलले ताला फुटाएका हुन् ।
ताला फुटाएका उनले विज्ञप्ति जारी गर्दै सहमतिमा अघि बढ्नका लागि बोलाइएको छलफल निष्कर्षमा नपुगेपनि सेवाग्राहीले सास्ती भाेग्नु परेका कारण ताला फुटाउनु परेकाे बताए ।
गत माघ ११ गते शुक्रबार वडा कार्यालयको सर्भर डाउन गरिदिएपछि उपमेयरसहित एमालेका वडाध्यक्षहरुसँग प्रशासन शाखा प्रमुख खड्काको भनाभन भएको थियो । भनाभनपछि जनप्रतिनिधिले खड्कालाई बाहिर निकालेर उनको कार्यकक्षमा ताला लगाइदिएका थिए । त्यसको विरोधमा कर्मचारीले आन्दोलन घाेषणा गरेका थिए ।
कर्मचारी र एमालेबाट निर्वाचित जनप्रतिनिधिबीच लफडा हुनुको कारण भने कर्मचारीको सरुवा हो । गत पुस २८ गते मेयर हेमकर्ण पौडेल र प्रमुख कार्यकारी अधिकृत रामचरित्र मेहताले ७७ जना कर्मचारीको सरुवा गरेका थिए ।
कर्मचारीको सरुवाको निर्णयपछि पौडेल उपमेयर संगीताकुमारी चौधरीलाई कार्यवाहक दिएर बिदा बसे । उनी १३ गते आइतबार मात्रै कार्यालयमा हाजिर भए । कर्मचारी सरुवा गर्दा पक्षपात गरेको भन्दै माघ ३ गते उपमेयर चौधरीको अध्यक्षतामा बसेको बहुमत कार्यपालिका सदस्यको बैठकले सरुवाको निर्णय उल्टाएको थियो ।
कर्मचारी सरुवा गर्दा मेयर पौडेलले छलफल नगरी कांग्रेसले नेतृत्व गरेको वडा नम्बर १, ६ र १३ सहितका वडाबाहेक एमालेले नेतृत्व गरेका वडाका कर्मचारीको सरुवा गरेको एमालेका जनप्रतिनिधिको गुनासो छ ।
उपमेयरले सरुवाको निर्णय उल्टाए पनि प्रशासन प्रमुख खड्काले सरुवा भएको क्षेत्रमा जान भन्दै कर्मचारीलाई दबाब दिएका थिए । कर्मचारीले जान नमानेपछि ११ गते शुक्रबार वडाको ‘सर्भर’ नै डाउन गरिदिएपछि विवाद भएको थियो । त्यसपछि विवाद भएकाे थियाे ।
मेयर पौडेलले ताला फुटाएपछि उपमेयरले लिखित रुपमा माफी माग्नु पर्ने माग गर्दै आन्दोलनमा रहेका कर्मचारीले आन्दोलन फिर्ता गरेका छन् ।

























