
काठमाडौं । सिंहदरबारस्थित खानेपानी मन्त्रालयमा आगलागी हुँदा ३ वटा कोठामा क्षति पुगेको छ ।
मन्त्रालय भवनको चौथो तलामा आज (शनिबार) बिहान आगलागी भएको हो । आगोले ३ वटा कोठासहित त्यहाँ रहेका भौतिक संरचनामा क्षति पुगेको । कोठाभित्र रहेका सबै कागजात जलेका छन् ।
चौथो तलामा खानेपानी मन्त्रीको कार्यकक्षसमेत थियो । क्षतिको पूर्ण विवरण आइसकेको छैन । प्रहरीले क्षतिको विवरण संकलन गरिरहेको छ । दमकलको सहायतामा प्रहरीले आगो नियन्त्रणमा लिएको थियो ।
उक्त मन्त्रालयको भवनभित्र भौतिक पूर्वाधार तथा यातायात मन्त्रालयसमेत छ । आगलागीको कारण खुल्न नसकेको र विद्युत सर्ट भई आगलागी भएको हुनसक्ने अनुमान गरिएको प्रहरीले जनाएको छ । प्रहरीले क्षतिको विवरण संकलन गर्दै घटनाको अनुसन्धान अघि बढाएको छ ।

























