
विराटनगर । सुनसरीमा पिकअप गाडीको ठक्करबाट स्कुटर चालकको मृत्यु भएको छ । बराहक्षेत्र नगरपालिका–१ न्यू इन्टेकमा दुर्घटना भएको हो ।
पश्चिमबाट पूर्वतर्फ आउँदै गरेको प्र १–०२–०५१ प ४९९५ नम्बरको स्कुटरलाई पूर्वतर्फ नै आउँदै गरेको प्र १–०२–०२ च ५४७९ नम्बरको पिकअपले ठक्कर दिँदा सोमबार दिउँसो दुर्घटना भएको प्रहरीले जनाएको छ । प्रहरीका अनुसार दुर्घटनामा स्कुटर चालक धनकुटाको सहिदभूमि गाउँपालिका–१ का अन्दाजी २७ वर्षीय सुमन राईको मृत्यु भएको हो ।
पिकअपले ठक्कर दिएपछि गम्भीर घाइते भएका राईलाई उपचारका लागि बीपी कोइराला स्वास्थ्य विज्ञान प्रतिष्ठान लगिएको थियो । उपचारका क्रममा दिउँसो १ः३५ बजेतिर मृत्यु भएको जानकारी प्रहरीले दिएको छ ।
पिकअप र चालक उदयपुरको बेलका नगरपालिका–३ का २१ वर्षीय सविन साहलाई प्रहरीले नियन्त्रणमा लिएर घटनाको अनुसन्धान सुरु गरेको छ । पिकअपको तीव्र गतिका कारण दुर्घटना भएको प्रारम्भिक अनुसन्धानबाट खुलेको छ ।

























