
विराटनगर । कोशी प्रदेश स्तरीय टी २० क्रिकेट प्रतियोगितामा उदयपुरले विजयी सुरुवात गरेको छ ।
विराटनगर –१९ गिरिजाप्रसाद कोइराला क्रिकेट रंगशालमा मंगलबार भएको उद्घाटन खेलमा उदयपुरले इलामलाई २९ रनले पराजित गरेको छ । जितसँगै उदयपुरले २ अंक जोड्न सफल भयो ।
इलामले टस जितेर पहिलो ब्याटिङको निम्तो उदयपुरलाई दिएको थियो । पहिले ब्याटिङको मौका पाएको उदयपुरले १९ ओभरमा सबै विकेटको क्षतिमा ८५ रनको योगफल बनायो । प्रभात किरण राईले २२ रन, निर्देश बस्नेतले १५ रन र रिजन तिवारीले १० रन बनाए । इलामका लभ कामतले ४ विकेट र प्रज्ज्वल खत्रीले ३ विकेट लिए ।
८६ रनको विजय लक्ष्य पछ्याउने क्रममा इलामले १५ ओभर २ बलमा सबै विकेट गुमाउँदै ५६ रनमै समेटियो । श्याम यादवले १४ रन बनाए । उदयपुरका तेज आचार्य र सुशान्त तिम्सिनाले ३–३ विकेट लिए ।
खेलको प्लेयर अफ द म्याच उदयपुरका तेज आचार्यले २ हजार ५ सय प्राप्त गरे ।
मिल्स क्रिकेट क्लब एन्ड एकेडेमीको आयोजना र कोशी प्रदेश खेलकुद विकास बोर्डको संयोजनमा भएको प्रतियोगितामा ६ वटा जिल्लाको सहभागिता रहेको छ ।
कोशी प्रदेश खेलकुद विकास बोर्डका सदस्यसचिव कृष्ण बस्नेतले प्रतियोगिताको उद्घाटन गर्दै प्रदेशमा क्रिकेट खेलको विकास र प्रवर्धन गर्ने उद्देश्यले आयोजना गरेको बताए ।

प्रतियोगिताअन्तर्गत बुधबारको पहिलो खेल मोरङ र उदयपुर तथा दोस्रो खेल आयोजक मिल्स क्रिकेट क्लब एन्ड एकेडेमी र सुनसरीबीच हुने क्लबकी सचिव शान्ता जोशीले जानकारी दिइन् ।



















