
धरान । धरानमा जारी गोधुली रनिङ कप फुटबलको २५ औं संस्करणको क्वाटर फाइनलमा १३ र १७ नम्बर वडा पुगेको छ ।
प्रतियोगिताअन्तर्गत मंगलबार राति भएको पहिलो खेलमा ४ पटकको विजेता १७ नम्बर वडाले २० नम्बर वडालाई ३–० ले पराजित गर्दै क्वाटर फाइनलमा प्रवेश गरेको छ ।
१७ नम्बर वडाका लागि कृष्ण राईले २ गोल र पासाङ तामाङले १ गोल गर्दै टोलीलाई विजयी बनाए । खेलको म्यान अफ द म्याच १७ नम्बर वडाका कृष्ण राई भए ।
त्यसैगरी, दोस्रो खेलमा डिफेन्डिङ च्याम्पियन १३ नम्बर वडाले ४ नम्बर वडालाई २–० गोलअन्तरमा पराजित गर्दै क्वाटर फाइनलमा प्रवेश गरेको हो ।
१३ नम्बर वडाका लागि सुशान्त राई र निकोलस राईले गोल गरे । खेलको म्यान अफ द म्याच १३ नम्बर वडाका सुशान्त राई भए । प्रतियोगिताको बुधबार (आज) साँझमा ६ नम्बर वडा र १० नम्बर वडाबीच प्रतिस्पर्धा हुनेछ ।



















