स्वार्थी संसार गीत सार्वजनिक

विराटनगर । गीतकार नारायण खतिवडाको शब्द सिर्जना रहेको गीत ‘स्वार्थी संसार’ सार्वजनिक भएको छ ।

डिजिटल प्लेटफर्ममा सार्वजनिक गरिएको ‘स्वार्थी संसार’ गीतमा लक्ष्मण शेषको संगीत सिर्जना एवं स्वरूपराज आचार्यको स्वर रहेको छ ।

वरिष्ठ संगीतकार लक्ष्मण शेषको लामो समयपछि कमब्याक भएको छ । बहुसङ्ख्यक मानिसहरूले समय क्रममा स्वार्थ प्रेरित कुनै न कुनै अनुभव र घटना व्यवहोरेको भाव र सन्देश सो गीतमा रहेको छ ।

आजभोलि मानिसहरू आफ्नो स्वार्थका लागि जे पनि गर्न तयार हुने, लाभ लिने तर आफ्नो स्वार्थ पूरा भएपछि कुल्चेर हिड्ने प्रवृत्तिलाई गीतमा गहन रूपमा प्रस्तुत गरिएको पाइन्छ ।

गीतकार खतिवडाका यसभन्दा पहिला पनि दर्जनौँ गीतहरू बजारमा आएका छन् । सम्झनाका पाइलाहरू नामक गीति सङ्ग्रहमा १ सय ९ वटा गीतहरू समावेश छन् भने स्वदेश छोडी, मनका कुरा, विन्दास, देखूँ देखूँ, सन्देश पुर्‍याइदेऊ, मेरो कथा, चोखो चोखो लगायतका गीतहरू बजारमा आइसकेका छन् ।

सरकारी सेवामा रहेका खतिवडा गीत, कविता, मुक्तक र समसामयिक लेख रचना विधामा पनि कलम चलाउँदै आएका छन् ।

सामाजिक परिवेश, वर्तमान परिस्थिति, समसामयिक घटना, प्रेम, वियोगी, राष्ट्र र राष्ट्रियता पक्षलाई कलात्मक, रचनात्मक र सन्देशमूलक भावसहित साहित्यमा उतार्न स्रष्टा गीतकार खतिवडाको पछिल्लो सिर्जना ‘स्वार्थी संसार’ पनि एउटा उदाहरणीय गीत बनेको छ ।