‘के घर के डेराः घर नम्बर २’ देशभर प्रदर्शनमा

काठमाडौं । दिपेन्द्र के खनालद्वारा निर्देशित चलचित्र‘के घर के डेराः घर नम्बर २’ आज (शुक्रबार) देखि देशभर प्रदर्शनमा आएको छ ।

सामाजिक कथा बस्तुमा आधारित यस चलचित्रले शहरी गरिबी, डेरावालाको संघर्ष, घरबेटी–डेरावालाबीचको सम्बन्ध र आमनागरिकको जीवनकथालाई सजीव ढंगले उजागर गर्न खोजेको छ ।

खनाल सामाजिक विषयमा गहिरो पकड राख्ने सिने निर्देशकका रूपमा परिचित छन् । उनले यसपटक पनि शहरको वास्तविक जीवनभित्र गहिरिएर त्यही कथालाई पर्दामा उतारेका छन् ।

फिल्म रिलिजको पूर्वसन्ध्यामा बुधबार काठमाडौंको सुन्धारास्थित क्यूएफएक्स सिभिल मलमा विशेष प्रिमियर शो आयोजना गरिएको थियो ।

प्रिमियरमा निर्माण पक्षले बजार, मल र चोकमा भेटिएका १८० भन्दा बढी सर्वसाधारणलाई निमन्त्रणा गरेर फिल्म देखाएको थियो । निर्देशक खनालका अनुसार यो प्रयोग नेपाली फिल्म उद्योगमै पहिलो पटक गरिएको शैली हो ।

सेलिब्रिटी अथवा आफन्तहरूले प्रायः सकारात्मक प्रतिक्रिया दिने भएकाले दर्शकको इमान्दार भावना जान्नको लागि सर्वसाधारणलाई सहभागी गराएको निर्देशक खनालले बताए । प्रिमियरमा सहभागी आम दर्शकहरूले फिल्मप्रति उत्साहजनक प्रतिक्रिया दिएका थिए ।