नेपालको एसियन कप यात्रा टुंगियो

काठमाडौं । एएफसी एसियन कप फुटबल छनोट अन्तर्गतको निर्णायक खेलमा नेपाल पराजित भएको छ । उज्वेकिस्तानसँग टाइब्रेकरमा ४–२ गोल अन्तरले पराजित भएपछि नेपाली टोलीको एसियन कप, २०२६ को यात्रा टुंगिएको छ ।

छनोटअन्तर्गत निर्णायक खेलमा नेपाललाई हराउँदै घरेलु टोली उज्वेकिस्तान अर्को वर्ष अष्ट्रेलियामा हुने एसिया कपमा छनोट भएको हो । कप्तान सावित्रा भण्डारी र गोलकिपर अन्जना रानामगर टाइब्रेकरमा चुक्नु नेपालका लागि दुर्भाग्यपूर्ण बन्यो ।

Advertisement

उज्बेकिस्तानले खेलको दोस्रो मिनेटमा नै गोल गरेको थियो । ११ औं मिनेटमा उज्बेकिस्तानले अग्रता दोब्बर बनायो । २४ औं मिनेटमा सावित्रा भण्डारीले गोल गर्दै नेपाललाई खेलमा फर्काउने प्रयास गरिन् । तर, ३९ औं मिनेटमा पेनाल्टीमार्फत शोएमोभले गोल गर्दै उज्बेकिस्तानको अग्रता फेरि बढाएकी थिइन् ।

एन एर्गासेभाले दोहोरो पहेँलो कार्डसहित रातो कार्ड पाउँदै मैदान बाहिरिएपछि उज्बेकिस्तान दोस्रो हाफमा १० खेलाडीमा सीमित रहेको थियो । दोस्रो हाफको ७० औँ र ७१ औँ मिनेटमा सावित्राले लगातार गोल गर्दै नेपाललाई खेलमा फर्काइन् ।

निर्धारित समय ३–३ गोलको बराबरी भएपछि खेलको निर्णय टाइब्रेकरबाट लिइएको थियो । त्यसमा नेपाल पराजित हुन पुगेको हो ।