इमरान खानको पार्टीका १०८ जना नेता कार्यकर्तालाई लामो जेल सजाय, विपक्षी नेतासमेत परे

एजेन्सी । पाकिस्तानका पूर्वप्रधानमन्त्री इमरान खान नेतृत्वको पार्टी पाकिस्तान तहरीक–ए–इन्साफ (पीटीआई)का १ सय ८ जना नेता तथा कार्यकर्तालाई सैन्य विरोध प्रदर्शनमा संलग्न भएको आरोपमा जेल सजाय सुनाइएको छ ।

सन् २०२३ को मे महिनामा इमरान खान पक्राउपछिको हिंसात्मक आन्दोलनमा सहभागी भएको अभियोगमा उनीहरूलाई आतंकवाद विरोधी अदालतले विभिन्न अवधिको सजाय सुनाएको हो । सजाय पाउनेहरूमध्ये प्रमुख विपक्षी नेता तथा संघीय संसद्का सदस्य उमर अयुब खानलाई १० वर्षको जेल सजाय तोकिएको छ ।

Advertisement

उनी हाल पाकिस्तानको राष्ट्रियसभामा विपक्षी नेता थिए । सजाय तोकिएका अन्य नेतामा पार्टीका ६ जना सांसदसमेत छन् । उनीहरुलाई अदालतले अयोग्यसमेत ठहर गरेको छ ।

यो फैसला इमरान खानको पार्टीका लागि ठूलो राजनीतिक झट्का मानिएको छ । बिहीबार सुनाइएको सजायपछि पार्टीका प्रवक्ताहरूले अदालतको निर्णयको कडा निन्दा गरेका छन् । पीटीआईले यसलाई ‘राजनीतिक प्रतिशोध’ भन्दै अस्वीकार गरेर सर्वोच्च अदालतसम्म जाने चेतावनी दिएको छ ।

सन् २०२३ को मे ९ मा इमरान खानलाई भ्रष्टाचारको आरोपमा सुरक्षा बलले अदालत परिसरबाट गिरफ्तार गरेपछि देशभर हिंसात्मक विरोध सुरु भएको थियो । सो क्रममा सेनाका विभिन्न प्रतिष्ठानमा तोडफोड, आगजनी र आक्रमण भएको थियो ।

पाकिस्तानको सैन्य र राजनीतिक इतिहासमा यो प्रदर्शन सेनाविरुद्ध भएको सबैभन्दा ठूलो विरोधका रूपमा लिइन्छ । पाकिस्तानी सुरक्षानिकायले सो समयपछि हजारौं पीटीआई कार्यकर्ता पक्राउ गरेको थियो ।

अहिले सुनाइएको सजाय सोही घटनासँग सम्बन्धित अदालत प्रक्रियाको परिणाम हो । मानव अधिकारवादी समूहहरूले भने घटनाको निष्पक्ष छानबिन नभएको र सरकारले विपक्षी दललाई दबाउन कानुनको दुरुपयोग गरेको आरोप लगाएका छन् ।

पूर्वप्रधानमन्त्री इमरान खान स्वयं पनि अहिले जेलमै छन् । उनलाई हालसम्म विभिन्न मुद्दामा सयभन्दा बढी अभियोग लगाइएको छ । उनले आफ्नो गिरफ्तारीलाई राजनीतिक रूपमा नियोजित भएको भन्दै प्रधानमन्त्री शहबाज शरिफ नेतृत्वको सरकारले सेना र न्यायपालिकासँग मिलेर षड्यन्त्र गरेको दाबी गर्दै आएका छन् ।

पीटीआई समर्थकहरूबीच अदालतको यो फैसलापछि आक्रोश बढेको छ । स्वतन्त्र मताधिकार र लोकतान्त्रिक प्रतिस्पर्धामाथि ठूलो प्रहार भएको भन्दै आलोचना भइरहेका छन् । आगामी महिना पाकिस्तानमा स्थानीय चुनावको तयारी भइरहेकाले यो कदमले थप तनाव सिर्जना गर्न सक्ने आशंका गरिएको छ ।