नेपाल दुई खेलअघि नै टी–२० विश्वकपमा छनोट

विराटनगर । नेपाली क्रिकेट टोली टी २० विश्वकपमा छनोट भएको छ । ओमानमा जारी इस्ट एसिया प्यासिफिक क्वालिफायरमा दुई खेलअघि नै नेपाल विश्वकपमा छनोट भएको हो । घरेलु टीम पनि विश्वकपमा छनोट भएको छ । थप एक टीमको टुंगो लाग्न बाँकी छ ।

यूएईले सामोआलाई हराएपछि नेपाल र ओमानको विश्वकप यात्रा तय भएको हो ।

प्रतियोगितामा अपराजित रहेका दुवै टीमको दुई खेल बाँकी छ ।

नेपाल र ओमानले अहिलेसम्म सुपर सिक्समा ६ अंक बटुलेका छन् । रनरेटका आधारमा ओमान शीर्षस्थानमा छ । आज अहिले हुने खेलमा नेपालले ओमानलाई हराएको खण्डमा शीर्षस्थानमा उक्लिन सक्नेछ । नेपालले अन्तिम खेल शुक्रबार सामोआसँग खेल्ने छ ।

२०२६ मा हुने टी २० विश्वकप भारत र श्रीलंकाले संयुक्त रूपमा आयोजना गर्दैछन् । सन् २०१४ मा पहिलोपटक टी २० विश्वकप खेलेको नेपालले दोस्रो पटक खेल्न १० वर्ष पर्खिनुपर्यो । समग्रमा तेस्रो पटक र लगातार दोस्रो पटक नेपाल विश्वकपमा छनोट भएको हो ।