तिहारको खानपान : स्वादमा ध्यान दिँदा स्वास्थ्यलाई नबिर्सौं

Share this
730shares
मुलुकी खबर
मुलुकी खबर
clock२०८२ कात्तिक ५, बुधबार ०६:३३

विराटनगर । तिहारको रमझममा घरघरै सेलरोटी, अनरसा, झिनियाजस्ता परिकार र विभिन्न प्रकारका मिठाइहरू खाने गरिन्छ । तिहारको समयमा बिहानको खाजादेखि दिउँसोको खाजासम्म यी चिल्ला र गुलिया परिकारहरूको अधिक प्रयोग हुने गर्छ । भाइमसलाको रुपमा प्रयोग हुने ड्राइफ्रुट्सको बिक्री पनि यसबेला निकै बढेको हुन्छ ।

खाद्य सामग्रीको व्यापार गर्ने व्यवसायीहरूका अनुसार, तिहारमा यस्ता वस्तुको माग ५ गुणाभन्दा बढी आउने गरेको छ, जसले गर्दा माग धान्न उनीहरूलाई धौधौ परेको छ । तर, चाडबाडमा खाइने यी चिल्ला र गुलिया परिकारहरूले स्वास्थ्यमा तत्कालदेखि दीर्घकालसम्मै असर गर्न सक्ने चिकित्सकहरू बताउँछन् ।

स्वास्थ्यमा पर्ने असर:

तत्कालका समस्या: बढी गुलियो र चिल्लो खानाले पेट दुख्ने, झाडापखाला लाग्ने जस्ता समस्याहरू देखिन सक्छन् ।

दीर्घरोगीलाई जटिलता: मधुमेह, उच्च रक्तचाप, मुटु रोगजस्ता दीर्घरोग भएका व्यक्तिहरूले यस्ता परिकार खाँदा स्वास्थ्यमा थप जटिलताहरू निम्तिन सक्छ ।

मुटुरोग विशेषज्ञ डा. सूर्य देवकोटाका अनुसार, बजारमा पाइने मिठाइमा स्वास्थ्यलाई असर गर्न सक्ने नराम्रो चिज हुन सक्ने भएकाले ध्यान दिनु जरुरी छ । उनको सुझाव छ, ‘सकभर त्यो खालका परिकारहरू खाँदै नखाने, नभए घरमै बनाएर खाँदा राम्रो हुन्छ ।’

मिसावटले क्यान्सरसम्मको जोखिम:

व्यापारीहरूले मिठाइलाई आकर्षक देखाउन हानिकारक रंगको प्रयोग गर्ने तथा परिकारहरूमा मिसावटयुक्त तेल प्रयोग गर्ने गरेको पाइएको छ । चिकित्सकहरूका अनुसार यसले क्यान्सरसम्मको जोखिम निम्त्याउन सक्छ । यसै क्रममा, खाद्य प्रविधि तथा गुण नियन्त्रण विभागले चाडबाडलक्षित अनुगमनका क्रममा कतिपय मिठाइ पसलहरूलाई कारबाहीसमेत गरेको छ ।

के गर्ने ?

संयम अपनाऔं: खाँदै नखानु भनिएको त छैन, तर खानपानमा संयमित भएर ठिक्क मात्रामा मात्रै सेवन गरौं ।

गुणस्तरमा ध्यान दिऔं: सधैँ ताजा तथा गुणस्तरीय खानेकुरा मात्र खाऔं ।

ड्राइफ्रुट्स पनि धेरै नखाऔं: भाइमसलाको रुपमा प्रयोग हुने ओखर, काजु, पेस्ताजस्ता ड्राइफ्रुट्स स्वास्थ्यका लागि फाइदाजनक भए पनि बढी खाएमा स्वास्थ्य समस्या आउन सक्छ ।

दीर्घरोगीले ख्याल गरौं: कुनै रोग भएका व्यक्तिले नियमित औषधि सेवन गरी चिकित्सकको सुझावअनुसार जोखिमलाई ख्याल गर्दै मात्रै खानपान गर्नुपर्छ, जथाभावी खानु हुँदैन ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.