सिड्नीको बन्डी बिचमा १५ जनाकाे हत्या, बाबुछाेराले चलाएका थिए गाेली

विराटनगर । अष्ट्रेलियाकाे सिड्नीको बन्डी बिचमा भएको गोलीकाण्डमा १० वर्षीया बालिकासहित १५ जनाकाे मृत्यु भएकाे छ । मृतकहरूको उमेर १० वर्षदेखि ८७ वर्षसम्म रहेको न्यू साउथ वेल्स प्रहरीलाई उद्दत गर्दै बीबीसीले जनाएकाे छ ।

हनुका पर्वको सुरुवातको उपलक्ष्यमा एक कार्यक्रम चलिरहेको बेला यो आक्रमण भएको थियो । प्रहरीले घटनालाई आतङ्कवादी हमलाको रूपमा लिएर अनुसन्धान गरिरहेको छ ।

Advertisement

आक्रमणमा संलग्न दुई बन्दुकधारी पक्राउ परेका छन् । प्रहरीका अनुसार ५० वर्षीय बाबु र उनका २४ वर्षीय छोरा  पक्राउ परेका हुन् । प्रहरीको गोली लागेर वृद्ध बन्दुकधारीको घटनास्थलमै मृत्यु भएको छ । २४ वर्षीय छोराको उपचार भइरहेकाे छ ।

घटनामा ४२ जना घाइते भएका छन्, जसमध्ये घटनास्थलमा पुगेका केही प्रहरी अधिकारीहरू पनि छन् । घाइते सबैलाई उपचारका लागि अस्पताल लगिएको छ।

प्रहरीका अनुसार ५० वर्षीय बन्दुकधारीसँग वैध हतियार इजाजतपत्र थियो र उनका नाममा छवटा हतियार दर्ता थिए । आक्रमणस्थल बन्डी बिचमा छवटा हतियार फेला परेको प्रहरीले जनाएको छ ।

प्रधानमन्त्री एन्थोनी अल्बानीजले यस आक्रमणलाई ‘दुष्टताको कार्य’ र ‘सचेतरुपमा यहुदी समुदायलाई लक्षित गरिएको’ बताएका छन् ।