दयाहाङ अभिनित ‘मिरमिरे’ प्रदर्शनमा, देशभर १५० भन्दा बढी शो

काठमाडौँ । अभिनेता दयाहाङ राई मुख्य भूमिकामा रहेको चलचित्र ‘मिरमिरे’ आजबाट देशभरका हलहरूमा प्रदर्शनमा आएको छ। माघे सङ्क्रान्तिको अवसर पारेर सार्वजनिक गरिएको यो चलचित्रले बाबु र छोरीबीचको भावनात्मक सम्बन्ध र त्रिकोणात्मक प्रेमकथालाई मुख्य विषय बनाएको छ। अभिनेता दयाहाङले नेपाली कलाकारहरूमा ‘प्यासन’ (जोस) छैन भन्नेहरूका लागि यो चलचित्र एउटा बलियो जवाफ भएको र यही कारण आफूले यसमा काम गरेको बताएका छन्।

यम शेर्पाको लेखन तथा निर्देशन रहेको यस चलचित्रमा दयाहाङका साथै प्रकाश सपूत, सिर्जना निङलेखु, माओत्से गुरुङ, छुल्ठिम गुरुङ, भोलाराज सापकोटा लगायतका कलाकारहरूको अभिनय रहेको छ। यार्सा फिल्म्सको प्रस्तुति रहेको यस चलचित्रका निर्माताहरू निमु शेर्पा, छोङ्बा लामा शेर्पा र आङछिरिङ शेर्पा हुन् भने रोहित कट्टेल कार्यकारी निर्माताका रूपमा रहेका छन्।

वितरण र शो विवरण: करिब १०५ मिनेट लामो यो चलचित्रलाई आरआर फिल्म्सले वितरण गरेको हो। वितरण कम्पनीका अनुसार ‘मिरमिरे’ ले देशभर करिब १५० भन्दा बढी शो पाएको छ। देशकै ठुलो मल्टिप्लेक्स चेन क्यूएफएक्सले काठमाडौँ उपत्यकाभित्र १६ शो र मोफसलमा २३ शो उपलब्ध गराएको छ।

यसैगरी, आईएनआई सिनेमाजले ११ शो, बिग मुभिजले ३ शो, एफक्युब सिनेमाले ५ शो र वान सिनेमाजले आफ्ना दुई आउटलेटमा गरी ९ शो प्रदान गरेका छन्। माघे सङ्क्रान्तिको बिदा र दयाहाङ–प्रकाश सपूतको क्रेजका कारण चलचित्रले बक्स अफिसमा राम्रो सुरुवात गर्ने अपेक्षा गरिएको छ।