सर्वोच्च अदालतमा जलेका १० हजार बढी मुद्दाको मिसिल पुनः तयार

काठमाडौँ । सर्वोच्च अदालतले गत भदौमा भएको आगजनीका क्रममा जलेर नष्ट भएका मुद्दाहरूको मिसिल पुनः तयार गर्ने कार्यलाई तीव्रता दिएको छ। सर्वोच्चमा रहेका कुल २४ हजार मुद्दाका मिसिलमध्ये आगलागीमा परेर करिब २० हजार मिसिल नष्ट भएका थिए।

सर्वोच्च अदालतका प्रवक्ता निराजन पाण्डेका अनुसार पुस २१ गतेसम्म सेवाग्राही संस्था, महान्यायाधिवक्ताको कार्यालय र सम्बन्धित पक्षहरूबाट प्राप्त कागजातका आधारमा १० हजार ३४० मुद्दाका मिसिल तयार पारिएको छ। गत भदौ २४ गते ‘जेनजी’ आन्दोलनका क्रममा भएको आगलागीबाट चार हजार थान मिसिल मात्र जोगिएका थिए।

अदालतले जलेका मिसिलहरूको प्रतिलिपि उपलब्ध गराउन महान्यायाधिवक्ताको कार्यालय, नेपाल बार एसोसिएसन र मुद्दाका सम्बन्धित पक्षहरूलाई आग्रह गरेको थियो। सोही आग्रह बमोजिम कागजात सङ्कलन भइरहेको र बाँकी मिसिलहरू पनि तयार पार्ने काम जारी रहेको अदालतले जनाएको छ।