बोक्सीको आरोपमा आमा-छोराको हत्या

झारखण्ड । भारतको झारखण्ड राज्यमा बोक्सीको आरोपमा एक महिला र उनका १० महिने छोरालाई जिउँदै जलाएर हत्या गरिएको छ। पूर्वी राज्य झारखण्डको कुदसाई गाउँमा भएको यस अमानवीय घटनामा संलग्न भएको आरोपमा प्रहरीले चार जनालाई पक्राउ गरेको छ।

आक्रमणमा महिलाका श्रीमान् कोलहान सिन्कु गम्भीर घाइते भएका छन् र उनको हाल अस्पतालमा उपचार भइरहेको छ। उनले आफ्नी श्रीमती र सन्तानलाई बचाउन निकै अनुनय गर्दा पनि उग्र भीडले घरमा आगो लगाइदिएको बयान दिएका छन्।

Advertisement

यो घटना गाउँमा फैलिएको अन्धविश्वास र अफवाहका कारण निम्तिएको खुलेको छ। स्थानीय पुस्तुन बिरुवा नामका व्यक्तिको बिरामी र मृत्युपछि ज्योति सिन्कुले बोक्सी विद्या प्रयोग गरेको भन्दै गाउँलेहरू आक्रोशित भएका थिए। गरिबीका कारण बिरामीलाई अस्पताल लैजानुको साटो धामीझाँक्रीको शरणमा पुग्दा उनीहरूले तन्त्रमन्त्रको प्रभाव रहेको भनिदिएपछि हिंसा भड्किएको थियो।

झारखण्डको राजधानी राँचीबाट २५० किलोमिटर टाढा रहेको यो दुर्गम आदिवासी बस्तीमा स्वास्थ्य सेवाको पहुँच नहुँदा यस्ता अन्धविश्वासले प्रश्रय पाउने गरेको छ। भारतमा सन् २००० देखि २०१६ को बिचमा बोक्सीको आरोपमा २५०० भन्दा बढी मानिसको हत्या भइसकेको तथ्याङ्क छ। केही महिनाअघि मात्र बिहारमा पनि यस्तै प्रकृतिको घटनामा एकै परिवारका पाँच सदस्यको हत्या भएको थियो।

प्रहरीले घटनामा संलग्न अन्यको खोजीका लागि विशेष टोली परिचालन गरेको छ। साथै, ग्रामीण क्षेत्रमा यस्ता घातक अन्धविश्वासविरुद्ध जनचेतनामूलक कार्यक्रमहरू सञ्चालन गर्ने प्रतिबद्धता पनि जनाएको छ।