
झापा । चालू आर्थिक वर्ष २०८२/८३ को माघ मसान्तसम्ममा पूर्वी नाका काँकडभिट्टाबाट ११ अर्ब ५२ करोड २६ लाख ४६ हजार मूल्य बराबरको पेट्रोलियम पदार्थ आयात भएको छ। पूर्वी नाकाबाट मुख्यगरी पेट्रोल, डिजेल, एलपी ग्यास, एटीएफ र मट्टितेल आयात भएको मेची भन्सार कार्यालयले जनाएको छ।
मेची भन्सार कार्यालयका सूचना अधिकारी एवं भन्सार अधिकृत ईश्वरकुमार हुमागाईंका अनुसार गत आर्थिक वर्ष २०८१/८२ को सोही अवधिको तुलनामा यस वर्ष ६० करोड २० लाख १० हजार रुपैयाँले पेट्रोलियम पदार्थको आयातमा वृद्धि भएको छ। आयात बढेसँगै पेट्रोलियम पदार्थबाट प्राप्त हुने राजस्वमा समेत ६.७० प्रतिशतले वृद्धि भएको सूचना अधिकारी हुमागाईंले जानकारी दिए।
भन्सार कार्यालयको तथ्याङ्कअनुसार चालू आर्थिक वर्षको पहिलो सात महिनामा पेट्रोलियम पदार्थको आयातबाट मात्रै पाँच अर्ब ६३ करोड ४५ लाख ७३ हजार रुपैयाँ राजस्व सङ्कलन भएको छ। यस अवधिमा ५ अर्ब ५३ करोड ४१ लाख रुपैयाँ मूल्य बराबरको ६२ हजार ९३२ किलोलिटर पेट्रोल आयात भएको छ भने ३ अर्ब ८१ करोड २८ लाख रुपैयाँ मूल्यको ४० हजार ३५२ किलोलिटर डिजेल भित्रिएको छ।
अन्य पेट्रोलियम पदार्थको विवरण दिँदै सूचना अधिकारी हुमागाईंले बताएअनुसार सात महिनाको अवधिमा १ अर्ब ४६ करोड ३१ लाख मूल्य पर्ने १४ हजार ९९९ मेट्रिक टन एलपी ग्यास नेपाल भित्रिएको छ। यस्तै ४३ करोड ५८ लाख मूल्यको ४ हजार ७३६ किलोलिटर हवाई इन्धन (एटीएफ) र ११ करोड ३० लाख मूल्य बराबरको १ हजार २१२ किलोलिटर मट्टितेल आयात भएको छ।

























