
काठमाडौं । अमेरिका, इजरायल र इरानबीचको बढ्दो सैन्य संघर्षका कारण विश्वबजारमा कच्चा तेलको मूल्यमा भारी वृद्धि भएको छ। एसियाली बजार सोमबार बिहान खुल्नेबित्तिकै ब्रेन्ट क्रुड र नायमेक्स लाइट स्वीट आयल दुवैको मूल्यमा १० प्रतिशतभन्दा बढीको वृद्धि देखिएको छ।
बीबीसी हिन्दीका अनुसार सुरुवाती वृद्धिपछि मूल्यमा केही सामान्य कमी आए पनि तेलको बजार अझै अस्थिर छ। सोमबार बिहान ५ बजेसम्म ब्रेन्ट क्रुडको मूल्य करिब ९ प्रतिशतले बढेर प्रतिब्यारेल ७९.३० डलर पुगेको थियो भने नायमेक्स ८.५ प्रतिशतको वृद्धिसहित ७२.७० डलर आसपास रहेको छ।
इरान र इजरायलबीचको प्रत्यक्ष युद्धले विश्वव्यापी इन्धन आपूर्तिमा संकट आउने डर बढेको छ। शनिबार बिहान इजरायल र अमेरिकाले इरानमाथि ठुलो हमला गरेका थिए। उक्त आक्रमणमा इरानका सर्वोच्च नेता आयतोल्लाह अली खामेनीको मृत्यु भएको समाचार सार्वजनिक भएको छ।
आक्रमणमा इरानी सेनाका चिफ अफ स्टाफ अब्दुल रहीम मौसवी र रक्षामन्त्री मेजर जनरल अजीज नासिरजादेह लगायतका उच्च पदस्थ अधिकारीहरू पनि मारिएका छन्। इरानको नेतृत्व तहमा भएको यो ठुलो क्षतिपछि मध्यपूर्वमा तनाव उत्कर्षमा पुगेको छ, जसको सिधा असर अन्तर्राष्ट्रिय तेल बजारमा परेको हो।

























