मोरङ कारागारमा सुतिरहेका कैदीमाथि चौकीदारको कट्टी प्रहार, दुई जना गम्भीर घाइते

Share this
718shares
मुलुकी खबर
मुलुकी खबर
clock२०८२ फागुन २३, शनिबार ०८:१९

विराटनगर । विराटनगर महानगरपालिका–८ स्थित जिल्ला कारागार मोरङमा शनिबार बिहानका राति सुतिरहेका कैदीबन्दीमाथि चौकीदारले नै कट्टी प्रहार गरेका छन् । कट्टी प्रहारबाट दुई जना भएका छन् । एक जनाको अवस्था गम्भीर र एक जनाको मध्यम छ ।

घाइते हुनेहरुमा एक जना भारतीय नागरिक पनि छन् । घटनामा परेर भारतको उत्तर प्रदेश दिनाजपुर गौरी घर भएका ३५ वर्षीय चन्चल बर्मन र मोरङको ग्रामथान गाउँपालिका–५ घर भएका २८ वर्षीय सञ्जय चौधरी घाइते भएको कारागार प्रशासक गौरव ढुंगेलले बताए ।

उनका अनुसार बर्मन मानब बेचबिखन तथा ओसारपसार र चौधरी चोरी तथा डाँका मुद्दाका कैदी हुन् । गम्भीर अवस्थाका बर्मनको अनुहारभरि गहिरो चोट लागेको छ । मध्यम अवस्थाका चौधरीको हातमा चोट लागेको छ । कोशी अस्पतालमा सम्भव नभएपछि दुवै जनालाई थप उपचारका लागि विराटनगरस्थित नोबेल शिक्षण अस्पतालमा लगिएको छ ।

अस्पतालले पनि बर्मनको अवस्था गम्भीर र चौधरीको मध्यम रहेको जानकारी दिएको छ । घाइते दुवै जनामाथि सुतिरहेका बेला कारागारको ‘बी ब्लक’का चौकीदार गोपाल दनुवारले बिहानका राति ३ बजेतिर कट्टीले अन्धाधुन्ध आक्रमण गरेको कारागार प्रशासक ढुंगेलले बताए । मोरङको उर्लाबारी नगरपालिका–१ घर भएका ३१ वर्षीय दनुवार जबरजस्ती करणी मुद्दाका कैदी हुन् ।

उनले ‘बी ब्लक’मा चौकीदारको जिम्मेवारी पाएका थिए । घटनामा परेर घाइते भएकाहरुलाई पनि सोही ‘ब्लक’मा राखिएको थियो । दनुवारले सुतिरहेका कैदीमाथि किन आक्रमण गरेका हुन् भनेर यकिन भइसकेको छैन ।

घटनामा प्रयोग गरिएको कट्टीसहित दुनवारलाई नियन्त्रणमा लिएर घटनाको अनुसन्धान सुरु गरिएको मोरङ प्रहरीका सूचना अधिकारी डीएसपी हरिनन्दन चौधरीले बताए । उनका अनुसार जिल्ला प्रहरी कार्यालय मोरङको हिरासतमा रहेका दनुवारले आफू निद्रामा रहेका बेला कट्टी हानेको मात्रै भनेका छन् ।

‘निद्राका बेला कट्टी हानेछु, मलाई केही थाहा छैन भनिरहेका छन् । घटनामा प्रयोग गरिएको हतियारसहित नियन्त्रणमा लिएर थप सोधपुछ र अनुसन्धान गर्ने काम भइरहेको छ,’ उनले भने । चौधरीका अनुसार एउटै ‘ब्लक’मा सँगै सुतेका कैदीमाथि चौकीदार दनुवारले कट्टी प्रहार गरेको प्रारम्भिक अनुसन्धानबाट खुलेको छ ।

घटनासँग सम्बन्धित थप विषय अनुसन्धानपछि मात्रै पत्ता लाग्ने प्रहरीले जनाएको छ । कैदीबन्दीलाई राखिएको कारागारभित्र कसरी कट्टी छिराइयो भन्ने गम्भीर प्रश्न उठेको छ । कारागार सुरक्षार्थ खटिएका सुरक्षाकर्मीले बेवास्ता गर्दा कैदीबन्दी राख्ने ‘ब्लक’भित्र नै घरेलु हतियार पुर्याउन सहज भएको हुनसक्ने अनुमान छ ।

कैदीबन्दीहरूबीच झगडा, विवाद वा अनुशासनहीन गतिविधि भए तुरुन्त नियन्त्रण गर्ने र माथिल्लो अधिकारीलाई जानकारी दिने जिम्मेवारीमा रहेका चौकीदार आफैंले यस्तो घटना गराएपछि मोरङ कारागारभित्रको शान्ति सुरक्षाको अवस्थालाई लिएर गम्भीर प्रश्न खडा भएको छ । दैनिक व्यवस्थापनसहित कारागारमा आधारभूत सुरक्षा र अनुशासन कायम राख्ने कैदीहरूको निगरानी, उपस्थिति जाँच, आवतजावत व्यवस्थापन र जेलभित्रको सामान्य शान्ति कायम राख्ने जिम्मेवारी पनि चौकीदारकै हुन्छ ।

सुरक्षाकर्मी र कारागार प्रशासकको जस्तो उच्च जिम्मेवारी नभए पनि जेलभित्रको व्यवस्थापन, निगरानी, अनुशासन र सुरक्षा कायम राख्ने महत्वपूर्ण भूमिका चौकीदारको हुन्छ । तर, चौकीदारले नै अरु कैदीमाथि आक्रमण गरेका छन् ।

चौकीदार दनुवार मानसिक समस्यामा रहेको हुनसक्ने कारागार प्रशासक ढुंगेलले बताए । ‘के कारणले घटना भयो भन्ने यकिन छैन । चौकीदारलाई मानसिक समस्या हुनसक्छ । प्रहरीको अनुसन्धानबाट घटनाको वास्तविक कारण पत्ता लाग्छ,’ उनले भने ।

तपाइको प्रतिक्रिया
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
© 2024 Muluki Khabar. All Rights Reserved. Design & Develop By: Indesign Media Pvt. Ltd.