
काठमाडौं। निर्वाचनपछिको सेयर बजारमा मंगलबार उल्लेख्य उत्साह देखिएको छ । यस दिन साढे ७ महिनायताकै उच्च २१ अर्ब ५० करोड रुपैयाँ बराबरको सेयर किनबेच भएको छ ।
यसअघि गत साउन ११ गते २६ अर्ब ५७ करोडको कारोबार भएको थियो भने आजको कारोबार रकम त्यसयताकै सबैभन्दा धेरै हो । अघिल्लो दिन बजारमा ६ प्रतिशतको सकारात्मक सर्किट लागेर कारोबार छिटै स्थगित भएकाले आज लगानीकर्ताको चाप उच्च देखिएको हो ।
कारोबार रकममा कीर्तिमान कायम भए तापनि नेप्से परिसूचक भने ३२.०८ अङ्क (१.११ प्रतिशत) ले घटेर २८४३ विन्दुमा कायम भएको छ । बजार सुरु हुँदा तीव्र उतारचढाव देखिए पनि अन्तिम समयमा केही सम्हालिएको थियो । आज ७८ कम्पनीको सेयर मूल्य बढ्दा १७८ कम्पनीको मूल्यमा गिरावट आएको छ ।
निर्जीवन र जीवन बीमा समूहमा सामान्य सुधार देखिए पनि बैंकिङ, विकास बैंक, फाइनान्स, जलविद्युत् र होटल लगायतका अन्य सबै उपसमूहका सूचकहरू घटेका छन् ।
आज रिलायन्स स्पिनिङ मिल्स र साल्पा विकास बैंकको सेयर मूल्यमा १० प्रतिशतको सकारात्मक सर्किट लागेको छ । त्यस्तै थ्रीस्टार हाइड्रोपावर र कालिका पावरका लगानीकर्ताले पनि राम्रो नाफा कमाएका छन् ।
अर्कातर्फ हिमस्टार ऊर्जाको मूल्यमा सबैभन्दा धेरै ६.३६ प्रतिशतको गिरावट आएको छ । आज सबैभन्दा धेरै कारोबार हुने कम्पनीहरूमा ङादी ग्रुप, आँखुखोला जलविद्युत् र अपी पावर अग्रस्थानमा रहेका छन् ।

























