
काठमाडौं। स्थानीय सेयर बजारमा बुधबार ४६.७८ अंकको गिरावट आएको छ । सो घटाइसँगै नेप्से परिसूचक २७९६ अंकमा झरेको छ । बजार खुलेको पहिलो एक घण्टा उतारचढाव देखिए पनि त्यसपछि बजार निरन्तर ओरालो लागेको हो ।
यसअघि सोमबार सकारात्मक सर्किट ब्रेक लागेर २८७५ अंकसम्म पुगेको नेप्से त्यसयताका दुई दिनमा ७९ अंकले घटिसकेको छ । बुधबार ३४ कम्पनीको सेयर मूल्य बढ्दा २२५ कम्पनीको मूल्य घटेको छ भने ३ कम्पनीको मूल्य स्थिर रह्यो । कारोबार रकममा पनि अघिल्लो दिनको तुलनामा ३८ प्रतिशतले कमी आएको छ । मंगलबार २१ अर्ब ५० करोड रुपैयाँको कारोबार भएकोमा बुधबार १३ अर्ब १८ करोड रुपैयाँमा सीमित भएको छ ।
समूहगत रूपमा हेर्दा व्यापार समूह सबैभन्दा धेरै ३.४ प्रतिशतले घटेको छ । यस्तै बैंकिङ १.८२, विकास बैंक १.६१, फाइनान्स २.०८, होटल तथा पर्यटन १.५६, हाइड्रोपावर ०.७१, लगानी १.८७, जीवन बीमा १.९८, उत्पादन तथा प्रशोधन १.४३, माइक्रोफाइनान्स १.६४, निर्जीवन बीमा ०.९७ र अन्य समूह १.८३ प्रतिशतले घटेका छन् ।
बजार घटे पनि साल्पा विकास बैंक र नेसनल हाइड्रोपावरको सेयर मूल्यमा १० प्रतिशतको वृद्धि देखिएको छ । रिलायन्स स्पिनिङ मिल्सको ९.३३ र रिडी पावरको ५.७२ प्रतिशतले मूल्य बढ्यो । यता कालिका पावरको मूल्य सबैभन्दा धेरै ८.४७ प्रतिशतले घट्दा पन्चकन्या माइ हाइड्रोपावरको ५.७७, थ्रीस्टार हाइड्रोपावरको ५.३७ तथा ट्रेड टावरको ४.४७ प्रतिशतले मूल्य ओरालो लागेको छ ।
आज रिडी पावर, आँखुखोला जलविद्युत्, नेसनल हाइड्रोपावर, अपी पावर र ङादी ग्रुप धेरै कारोबार हुने कम्पनीको सूचीमा परेका छन् ।

























