
झापा । झापाको भद्रपुरबाट ७ जना पक्राउ परेका छन् । पक्राउ परेकाको साथबाट लागुऔषध ब्राउन सुगर (खैरो हेरोइन) बरामद भएको प्रहरीले जनाएको छ ।
जिल्ला प्रहरी कार्यालय झापा र लागुऔषध नियन्त्रण ब्युरो काँकडभिट्टाको संयुक्त टोलीले गोप्य सूचनाका आधारमा दुईवटा अलगअलग स्थानबाट उनीहरुलाई पक्राउ गरेको हो । भद्रपुर नगरपालिका–६ स्थित श्रवण यादवको घरमा मंगलबार राति ९ः३० बजेतिर प्रहरीले छापा हानेको थियो ।
यादवको भान्सा कोठाको किचनर्याकभित्र ५० ग्राम ४३० मिलिग्राम ब्राउन सुगरजस्तो देखिने पदार्थ फेला परेको प्रहरीले जनाएको छ । त्यसलगत्तै प्रहरीले ३१ वर्षीय यादवसहित भद्रपुर–६ का २० वर्षीय गणेश राजवंशी र २६ वर्षीय प्रकाश राजवंशीलाई पक्राउ गरेको छ ।
त्यस्तै, भद्रपुर–५ बसपार्क क्षेत्रमा रहेका व्यक्तिहरुबाट राति २२ः३० बजेतिर प्रहरीले ११ ग्राम २०० मिलिग्राम ब्राउन सुगर बरामद गरेको छ । ४ जना पक्राउ परेका छन् ।
पक्राउ पर्नेमा भद्रपुर–५ का ३० वर्षीय सुभम साह, भद्रपुर–४ का ३० वर्षीय जयकरण कहार, भद्रपुर–६ का ३५ वर्षीय दुलाल सेख र २९ वर्षीय मोहम्मद अमिर बाबु रहेका छन् । पक्राउ परेकाहरुलाई जिल्ला प्रहरी कार्यालयको हिरासतमा राखेर थप अनुसन्धान अघि बढाइएको छ ।

























