विराटनगरमा पत्नीको हत्यापछि शव व्यवस्थापनमा सीटी सफारीको प्रयोग

मुलुकी खबर

२०८२ चैत्र ११, बुधबार १७:५५

विराटनगर । विराटनगर महानगरपालिका–१५ हर्ताली हाटका ३५ वर्षीय रोशन साहले पत्नीको हत्या गरेपछि शव व्यवस्थापनका लागि सीटी सफारी प्रयोग गरेको पत्ता लागेको छ ।

रोनशले पत्नी ३२ वर्षीया कोमलकुमारी साहको हत्या चैत ५ गते राति गरेको प्रहरीले जनाएको छ । प्रहरीका अनुसार घरभित्रै हत्या गरेपछि प्रदेश १–०२–००३ ह ५७०७ नम्बरको सीटी सफारीमा राखेर शवलाई विराटनगर–१७ स्थित छाला फ्याक्ट्रीनजिक रहेको कल्भर्टमुनि फालिदिएको पत्ता लागेको हो ।

उक्त सफारी रोशनकै दाजु ४६ वर्षीय दीपेन्द्र साहको हो । घरबाट शव फालेको स्थान लगभग ४ किलोमिटर पूर्वमा रहेको प्रहरीले जनाएको छ । मोरङ प्रहरीले बुधबार पत्रकार सम्मेलन गरेर घटनासँग सम्बन्धित विस्तृत विवरण सार्वजनिक गरेको छ ।

मोरङ प्रहरीका सूचना अधिकारी, डीएसपी लीलाराज लामिछानेका अनुसार रोशनले पत्नीको हत्या गरेपछि शवलाई लुकाउन सुनियोजित प्रयास गर्ने क्रममा दाजु दीपेन्द्रको सीटी सफारी प्रयोग गरेको खुलेको छ । ‘साडी र गलबन्धीले घाँटी कसेर हत्या गरेपछि दाजुसँगको समन्वयमा शव व्यवस्थापन गरेको पाइयो । शव राखेको सफारी दीपेन्द्रले चलाए । रोशन पनि सँगै गए । छाला फ्याक्ट्रीनजिक पुगेपछि शव फालेर उनीहरु फर्किए,’ लामिछानेले भने ।

उनका अनुसार प्रारम्भिक अनुसन्धानबाट हत्यामा भने रोशनको मात्रै संलग्नता देखिएको छ । ‘हत्या गरेपछि शव व्यवस्थापनका लागि दाजु (दीपेन्द्र)को सहयोग लिएको देखिन्छ । हालसम्मको अनुसन्धानबाट घटनामा दीपेन्द्रको संलग्नता देखिँदैन । घटनामा उनको कतिसम्मको संलग्नता थियो भन्ने कुरा खोजी गर्दैछौं । अरु विस्तृत कुरा थप अनुसन्धानपछि खुल्छ,’ उनले भने ।

रोशनले हत्यापछि हातखुट्टा बाँधी पत्नीको शवलाई तन्नाले बेरेर करिब ४ किलोमिटर पर रहेको कल्भर्टको पानीमा फालिदिएको प्रहरीले जनाएको छ । हत्यापछि शव व्यवस्थापन गरेर घटना लुकाउनलाई घरदेखि निक्कै टाढाको स्थान रोजिएको पत्ता लागेको छ ।

घटनाको खुलासा भने चार दिनपछि भएको हो । कल्भर्टमुनि पानीभित्र तन्नाले बेरिएको अवस्थामा शव देखिएपछि विराटनगर–१७ का वडाध्यक्ष समीर कमर मियाँले मंगलबार साँझ करिब ६ः५५ बजेतिर प्रहरीलाई खबर गरेका थिए । त्यसलगत्तै कोशी अस्पतालका फरेन्सिक चिकित्सकसहित डीएसपी लामिछाने र इलाका प्रहरी कार्यालय रानीका इन्स्पेक्टर कविन राई नेतृत्वको संयुक्त टोलीले घटनास्थलमा पुगेर अनुसन्धान सुरु गरेको थियो ।

शव सडेको र दुर्गन्धित अवस्थामा फेला परेकाले सुरुमा पहिचान गर्न कठिन भएको थियो । त्यसपछि प्रहरीले हराइरहेका व्यक्तिहरूको विवरणसँग मिलान गर्दै अनुसन्धान अघि बढायो । सोही क्रममा मृतक महिला कोमलकुमारी साह रहेको पुष्टि भयो ।

प्रहरीका अनुसार कोमलकुमारी चैत ६ गतेदेखि सम्पर्कविहीन थिइन् । रोशनले नै पत्नी हराएको नाटक गर्दै चैत ८ गते इलाका प्रहरी कार्यालय रानीमा हुलियासहितको निवेदन दिएका थिए । तर, अनुसन्धानको क्रममा उनले नै हत्या गरेर घटना लुकाउन खोजेको तथ्य बाहिर आएको छ ।

‘कल्भर्टमुनि भेटिएको शवको सुरुमा पहिचान भएन । अनुसन्धान गर्दै जाँदा सबै कुरा पत्ता लाग्यो । आफूले हत्या गरेर फालेको पत्नीको शव फेला परेपछि रोशन भारततिर भाग्न खोज्दै थिए । तत्काल नै प्रहरीको अर्को टोली परिचालन गरेर उनलाई घरबाटै पक्राउ गरिएको हो,’ डीएसपी लामिछानेले भने । उनका अनुसार तत्काल प्रहरी घरमा पुगेर नियन्त्रणमा लिन नपाएको भए रोशन फरार हुने थिए ।

प्रहरीले शव व्यवस्थापनमा सहयोग गर्ने रोशनका दाजु दीपेन्द्रलाई पनि पक्राउ गरेको छ । दुवै जना इलाका प्रहरी कार्यालय रानीको हिरासतमा छन् । उनीहरुविरुद्ध कर्तव्य ज्यान मुद्दा चलाउन बुधबार अदालतबाट म्याद थप गरेर अनुसन्धानको बाँकी प्रक्रिया अघि बढाइएको जानकारी प्रहरीले दिएको छ । इलाका प्रहरी कार्यालय रानीका इन्स्पेक्टर कविन राई नेतृत्वको टोलीले घटनाको विस्तृत अनुसन्धान गरिरहेको छ ।

प्रमाण नष्ट गर्न र घटना लुकाउन शवलाई टाढा पुर्‍याएर पानीभित्र फालेको लामिछानेको भनाइ छ । उनका अनुसार हातखुट्टा बाँधिएको, तन्नाले बेरिएको र पानीमा डुबाइएको अवस्थामा शव फेला पर्नुले घटना योजनाबद्ध रहेको यकिन हुन्छ । ‘छाला फ्याक्ट्री वरपरको वातावरण प्रायः दुर्गन्धित नै हुन्छ । त्यही भएकाले सडेर दुर्गन्ध आउँदा पनि कसैले पत्ता लगाउन नसकुन् भनेर योजनाबद्ध हिसाबले शव व्यवस्थापनका लागि छाला फ्याक्ट्रीनजिकको स्थान रोजेको पाइयो,’ उनले भने ।

रोशनलाई नियन्त्रणमा लिएर सोधपुछ गर्दा उनले अपराध स्वीकार गरिसकेको प्रहरीको भनाइ छ । पत्नीको हत्यापछि कुनै पनि शंका नहोस् भनेर रोशन ससुराली पक्षसँग सम्पर्कमा रहेका थिए । ‘घटना आफूले गराएको कसैलाई थाहा नहोस् भन्ने उद्देश्यले रोशन नियमित ससुरालीसँग सम्पर्कमा बसेका रहेछन् । पत्नीको शव व्यवस्थापन गरिसकेपछि बारम्बार ससुरालीमा आउजाउ गरेछन् । त्यहीँ गएर रात बसेको पनि पायौं,’ लामिछानेले भने ।

उनको ससुराली (कोमलकुमारीको माइती) विराटनगर–६ मा पर्छ । कोमलकुमारीले लगाएको चुरा, औंठी र हरियो साडीका आधारमा माइती पक्षले शवको सनाखत गरिदिएका हुन् । घटनास्थलबाट शवलाई कानुनी प्रक्रिया पूरा गरी मंगलबार राति करिब १० बजेतिर पोस्टमार्टमका लागि कोशी अस्पताल पठाइएको थियो । बुधबार दिउँसो पोस्टमार्टम गरेर शव आफन्तले जिम्मा लिइसकेका छन् ।

पोस्टमार्टम रिपोर्ट प्राप्त भएर अनुसन्धान सकिएपछि घटनासँग सम्बन्धित अन्य विषय पत्ता लाग्ने डीएसपी लामिछानेले बताए । सबै पोटोबाट घटनाको अनुसन्धान भइरहेको उनको भनाइ छ । रोशन र कोमलकुमारीका १२ वर्षका छोरा र १० वर्षकी छोरी छन् । छोराछोरी निदाइसकेपछि रातको समयमा रोशनले पत्नीको हत्या गरेको पाइएको प्रहरीले जनाएको छ ।

यस घटनाको पृष्ठभूमिमा दाम्पत्य सम्बन्धमा उत्पन्न अविश्वास मुख्य कारणका रूपमा देखिएको छ । प्रहरी स्रोतका अनुसार रोशनले पत्नीको परपुरुषसँग सम्बन्ध रहेको आशंकामा बारम्बार विवाद गर्दै आएका थिए । यही शंका र विवादले अन्ततः ज्यानै लिने निर्णयसम्म पुर्‍याएको प्रहरीको प्रारम्भिक निष्कर्ष छ ।