
काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले सरकारले जारी गरेको ‘शासकीय सुधारसम्बन्धी १०० बुँदे कार्यसूची’ र ‘निजी क्षेत्र संरक्षण एवं प्रवर्द्धन रणनीति’ को स्वागत गरेका छन्। सरकारको यो कदमले निजी क्षेत्रलाई उत्साहित बनाएको भन्दै उनले यसको सफल कार्यान्वयनका लागि सशक्त सहकार्य आवश्यक रहेको बताएका हुन्।
मन्त्रिपरिषद् बैठकबाट स्वीकृत कार्यसूचीले मुलुकको शासन प्रणालीलाई परिणाममुखी, पारदर्शी र उत्तरदायी बनाउने अध्यक्ष ढकालको विश्वास छ। विशेषगरी सेवा प्रवाहलाई डिजिटल र समयबद्ध बनाउने, प्रशासनिक सुधार, भ्रष्टाचार नियन्त्रण तथा लगानीमैत्री वातावरण निर्माणजस्ता विषयहरू समेटिनु सकारात्मक रहेको उनले उल्लेख गरे।
लामो समयदेखि उठाउँदै आएका धेरै विषयहरू यसमा समावेश भएको भन्दै ढकालले खुसी व्यक्त गरे। ‘हामी यस सुधार एजेन्डालाई स्वागत गर्दछौँ। यसको प्रभावकारी कार्यान्वयनबाट आर्थिक पुनरुत्थान, रोजगारी सिर्जना र दिगो विकासमा ठोस योगदान पुग्ने विश्वास लिएका छौँ,’ उनले भने।
यस निर्णयबाट निजी क्षेत्रको सुरक्षा सुदृढ हुने, व्यवसायीको मनोबल उच्च हुने र व्यवसाय सञ्चालनका लागि अनुकूल वातावरण बन्ने महासङ्घको ठहर छ। रणनीतिको सफल कार्यान्वयनले लगानी वृद्धि र समग्र आर्थिक समृद्धिमा टेवा पुग्ने विश्वास महासङ्घले लिएको छ।



















