सर्वोच्चको सिद्धान्त मिचेको भन्दै उच्चका न्यायाधीशद्वय विरुद्ध अवहेलना मुद्दा

काठमाडौं । उच्च अदालत पाटनका दुई न्यायाधीशविरुद्ध सर्वोच्च अदालतमा अवहेलना मुद्दा दर्ता भएको छ। नेपाल ल क्याम्पसका विद्यार्थी विवेक चौधरीले न्यायाधीशद्वय ऋषिराज भण्डारी र गोपालप्रसाद बास्तोलाविरुद्ध कारबाहीको माग गर्दै मुद्दा दर्ता गरेका हुन्। उक्त निवेदनको पेसी चैत १८ गतेका लागि तोकिएको छ।

उच्च अदालतले फैसला गर्दा सर्वोच्च अदालतबाट प्रतिपादित बाध्यकारी कानुनी सिद्धान्तको पालना नगरेको आरोप निवेदनमा लगाइएको छ। चौधरीले आफ्नो रिटमा सर्वोच्चका विभिन्न निर्णयबाट स्थापित सिद्धान्तहरू स्पष्ट उल्लेख गरे पनि त्यसलाई बेवास्ता गरी फैसला गरिएको दाबी गरेका छन्।

नगर प्रहरी तथा ट्राफिक प्रहरीले सवारी साधनमा ‘ह्विल लक’ लगाउने कार्य कानुनी आधारबिना गरिएको भन्दै बदर गराउन उच्चमा रिट दायर गरिएको थियो। तर, अदालतले ट्राफिक व्यवस्थापनका लागि सीमित स्रोत साधनका आधारमा ‘ह्विल लक’ प्रयोगलाई अवैध भन्न नमिल्ने भन्दै रिट खारेज गरिदिएको थियो।

सर्वोच्च अदालतले विभिन्न मुद्दामा ‘कानुनले स्पष्ट अधिकार नदिएसम्म कुनै पनि निकायले अधिकार प्रयोग गर्न नपाउने’ र ‘राज्यका प्रत्येक निकाय कानुनको अधीनमा रहनुपर्ने’ सिद्धान्त प्रतिपादन गरेको छ।

ती सिद्धान्तको जानाजानी अवज्ञा गरिएको भन्दै चौधरीले यो न्यायिक त्रुटि मात्र नभई अदालतको अवहेलना भएको जिकिर गरेका छन्। नेपालको संविधानको धारा १२८ (४) अनुसार सर्वोच्चले प्रतिपादन गरेको कानुनी सिद्धान्त सबैले पालना गर्नुपर्ने संवैधानिक व्यवस्था छ।