
इटहरी । सुनसरीको इटहरी रंगशालामा जारी १६औं इटहरी गोल्डकपको दोस्रो क्वाटरफाइनल खेल अत्यन्त रोमाञ्चक मोडमा टुंगिएको छ ।
साबिक विजेता मछिन्द्र फुटबल क्लबले झापा–११ फुटबल क्लबलाई सडेनडेथमा ८–७ गोल अन्तरले पराजित गर्दै सेमिफाइनलमा स्थान सुरक्षित गरेको हो ।
निर्धारित ९० मिनेटको खेल १–१ को बराबरीमा सकिएपछि खेलको निर्णय टाइब्रेकरबाट लिन खोजिएको थियो ।
त्यसमा दुवै टोलीले ५–५ गोल गरेपछि खेल सडेनडेथमा पुगेको थियो । निर्णायक क्षणमा झापाका गोलकिपर मौसम मगरको प्रहार बाहिरिएपछि मछिन्द्रको जित सुनिश्चित भयो । खेलमा झापा–११ ले दोस्रो हाफको ५५औं मिनेटमा बाबा टुण्डेको गोलबाट अग्रता लिएको थियो ।
तर, ८८औं मिनेटमा मछिन्द्रले पेनाल्टी अवसर पाएको थियो । जसलाई सनिस श्रेष्ठले गोलमा परिणत गर्दै खेल बराबरीमा ल्याएका थिए । त्यसपछि दुवै टोलीले थप गोल गर्न नसक्दा खेल टाइब्रेकरतर्फ धकेलिएको हो ।
टाइब्रेकरबाट पनि सम्भव नभएपछि खेलको निर्णय सडेनडेथबाट लिइएको हो । टाइब्रेकरमा मछिन्द्रका देवेन्द्र तामाङ, सनिस श्रेष्ठ, दीपेश गुरुङ, मिलन राई, शौरभ लिम्बू, एलिक श्रेष्ठ, विशाल भण्डारी र रोहित चन्दले सफल प्रहार गरेका थिए । पेमा तामाङको प्रहार भने झापाका गोलकिपरले बचाएका थिए ।
झापाका तर्फबाट प्रसान्त लिम्बू, निशान बस्नेत, बाबा टुण्डे, सलोमन किंग, राजेश दाहाल र किरण सुमारले गोल गरे । उत्कृष्ट प्रदर्शन गरेका सनिस श्रेष्ठ प्लेयर अफ दी म्याच घोषित हुँदै नगद १० हजार रुपैयाँ प्राप्त गर्न सफल भए ।
बुधबार हुने तेस्रो क्वाटरफाइनलमा आयोजक राष्ट्रिय जागृति क्लबले सातदोबाटो युथ क्लब ललितपुरसँग प्रतिस्पर्धा गर्नेछ । प्रतियोगिताको विजेताले १० लाख रुपैयाँ र उपविजेताले ५ लाख रुपैयाँ पुरस्कार पाउने आयोजकले जनाएको छ ।

























