फाइनलअघि खेलाडी भगाइएको सम्राट क्लबको आरोप

Share this
767shares
मुलुकी खबर
मुलुकी खबर
clock२०८३ बैशाख ६, आइतबार १६:२७
फाइनलअघि खेलाडी भगाइएको सम्राट क्लबको आरोप

विराटनगर । विराटनगरमा जारी ३८ औं विराट गोल्डकपको फाइनल खेलअघि घरेलु टोली सम्राट स्पोर्टिङ क्लबले आफ्ना दुई खेलाडी ‘भगाइएको’ गम्भीर आरोप लगाएको छ।

शनिबार वर्षाका कारण स्थगित भएर आइतबारका लागि सारिएको झापा–११ विरुद्धको निर्णायक खेलअघि एन्फाका एक सदस्यको संलग्नतामा खेलाडी भगाइएको क्लबको दाबी छ। क्लबका अध्यक्ष किरण गिरीले सामाजिक सञ्जालमार्फत मोरङ फुटबलका नेतृत्वकर्ताहरूले षड्यन्त्र गरेको आरोप लगाउँदै यसको हिसाब–किताब हुने चेतावनी दिएका छन् । उनले लेखेका छन्, ‘मोरङ फुटबलका ठालुहरूको हैसियत देखियो ! दलाल सबैको हिसाबकिताब हुन्छ।’

यता, मोरङ जिल्ला फुटबल संघका अध्यक्ष सञ्जीव बुढाथोकीले भने यी आरोपहरूको खण्डन गरेका छन् । उनले क्लब र खेलाडीबीचको आन्तरिक सम्झौताको विषय हुनसक्ने भन्दै बिना आधार संस्थालाई दोष लगाउनु गलत भएको बताएका छन् । पहिलो पटक सहभागी भएर फाइनल पुगेको सम्राट स्पोर्टिङले खेलअघि नै खेलाडी हराएपछि प्रतियोगितामा नयाँ मोड आएको छ ।

शनिबार स्थगित भएको फाइनल खेल आइतबार (आज) साँझमा विराटनगरको सम्राट स्पोर्टिङ क्लब र झापाको झापा ११ बीच खेल हुनेछ ।

 

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.