विश्वकप लिग- २ : घरेलु मैदानमा युएईमाथि नेपालको जित

काठमाडौं । आईसीसी विश्वकप क्रिकेट लिग–२ अन्तर्गत घरेलु मैदानमा सुरु भएको सिरिजको पहिलो खेलमा नेपालले युएईलाई ३७ रनले पराजित गरेको छ । शनिबार नेपालले दिएको २०१ रनको लक्ष्य पछ्याएको यूएई ४८ ओभर २ बलमा १६३ रनमा अलआउट भयो ।

युएईका लागि हर्पित सिंह भाटियाले सर्वाधिक ३९ रन बनाए । आर्यंश शर्मा १८, अदीब उसमानी १, मोहम्मद शाहदाद २, अक्षदीप नाथ ३०, कप्तान मोहम्मद वासिम ३४, खुजाइम तनविर १, अजय कुमार २ र निलांश केश्वानी १८ रनमा आउट भए । जुनेक सिद्दिकी ७ रनमा अविजित रहे ।

बलिङ तर्फ नेपालका लागि करण केसीले ४, सोमपाल कामी र सन्दीप लामिछानेले २–२ तथा दीपेन्द्रसिंह ऐरी र ललित राजवंशीले एक–एक विकेट लिए ।

त्यसअघि त्रिवि क्रिकेट मैदानमा टस हारेर पहिला ब्याटिङ गरेको नेपालले ४८ ओभर २ बलमा २०० रन बनाउन सक्यो । नेपालका लागि उपकप्तान दीपेन्द्रसिंह ऐरीले ७५ रन बनाए थिए ।

ओपनर कुशल भुर्तेल २४, आसिफ शेख ७, भीम सार्की १०, कप्तान रोहित पौडेल २, बसिर अहमद २०, आरिफ शेख १५, सोमपाल कामी १५ र करण केसी २२ रनमा आउट भएका थिए । बलिङमा यूएईका अजय कुमार र जुनेक सिद्दिकीले समान ३–३ विकेट लिए ।

लिग २ मा २१ खेल खेलेको नेपालले १३ हार, २ बराबरी र ६ जितसहित जम्मा १४ अंक जोडेको छ । समान खेल खेलेको युएई ५ जित र १६ हारसहित १० अंक जोडेर पुछारमा छ । नेपाल पुछारभन्दा एक स्थानमाथि छ ।