विश्वकप लिग–२:  नेपालले टस जितेर ब्याटिङ गर्दै, विनोद भण्डारीको पुनरागमन

काठमाडौं । आईसीसी विश्वकप लिग–२ अन्तर्गत शुक्रबार (आज) भइरहेको संयुक्त अरब इमिरेट्स (यूएई) विरुद्धको खेलमा नेपालले टस जितेर पहिले ब्याटिङ थालेको छ ।

कीर्तिपुरस्थित त्रिवि क्रिकेट मैदानमा केहीबेर अघि सुरु यस महत्त्वपूर्ण खेलमा नेपालले टस जित्दै ब्याटिङ रोजेको हो । घरेलु मैदान र दर्शकको साथ पाउने अपेक्षा गरिएको नेपाल आज यूएईमाथि जित निकाल्ने लक्ष्यका साथ मैदान आएको छ ।

Advertisement

आजको खेलमा नेपाली टोलीमा एउटा महत्त्वपूर्ण परिवर्तन देखिएको छ । अनुभवी खेलाडी विनोद भण्डारीले राष्ट्रिय टोलीमा पुनरागमन गरेका छन् । लामो समयपछि टोलीमा फर्किएका विनोदको उपस्थितिले नेपालको ब्याटिङ लाइनलाई थप मजबुत बनाउने अपेक्षा गरिएको छ ।

विश्वकप लिग–२ को तालिकामा महत्त्वपूर्ण अंक जोड्नका लागि दुवै टोलीका लागि यो खेल निकै अर्थपूर्ण मानिएको छ । त्रिवि मैदानमा खेल हेर्न दर्शकहरूको उल्लेख्य उपस्थिति रहेको छ ।

त्यस्तै, युवा ब्याटर अर्जुन कुमालले एक दिवसीय अन्तर्राष्ट्रिय क्रिकेट (ओडीआई)मा डेब्यू गरेका छन् । आईसीसी विश्वकप लिग–२ क्रिकेटअन्तर्गत त्रिवि क्रिकेट मैदानमा जारी खेलमा नेपालका युवा ब्याटिङ अर्जुनले डेब्यू गरेका हुन् ।

उनलाई कप्तान रोहित पौडेलले डेब्यू क्याप हस्तान्तरण गरे । अर्जुनले प्रधानमन्त्री (पीएम) कप एक दिवसीय क्रिकेटमा उत्कृष्ट प्रदर्शन गरेका थिए । सोही प्रदर्शनको आधारमा उनले पहिलो पटक राष्ट्रिय टोलीमा स्थान बनाएका हुन् । क्रिजमा जमेर लामो इनिङ खेल्ने क्षमता अर्जुनमा रहेको बताइएको छ ।