चिकित्सक संघमा डा. बद्री रिजालको जीत, कोशीको उपाध्यक्षमा डा. रोशन खड्का

काठमाडौं । नेपाल चिकित्सक संघको ३०औं कार्यकारिणीका लागि भएको निर्वाचनबाट डा. बद्री रिजाल अध्यक्षमा निर्वाचित भएका छन् ।

उनले ३१९६ मत प्राप्त गर्दै निकटतम प्रतिस्पर्धी डा. मंगल रावललाई २५६ मतले पराजित गरे । रावलले २९४० मत ल्याउँदा अर्का उम्मेदवार डा. नारायणप्रसाद भुसालले ८६९ मत पाए ।

वरिष्ठ उपाध्यक्षमा डा. सञ्जिव तिवारी विजयी भएका छन् । उनले ३०३६ मत प्राप्त गर्दा उनका प्रतिस्पर्धी डा. कीर्तिपाल सुवेदीले २३०२ र डा. अजयकुमार मिश्रले १४२१ मत ल्याए । महासचिवमा डा. विश्वराज दवाडी २७२२ मतसहित निर्वाचित हुँदा उनका प्रतिस्पर्धी डा. कालुसिंह खत्रीले २४२३ र डा. अमृत भुसालले १६४६ मत प्राप्त गरे ।

उपाध्यक्षहरूमा प्रदेशगत प्रतिनिधित्वअनुसार डा. रोशन खड्का (कोशी), डा. अमृत राजन मिश्र (मधेश), डा. सुवास भट्टराई (बागमती), डा. योगेशराज सिग्देल (गण्डकी), डा. नन्दा गुरुङ (लुम्बिनी), डा. रविन खड्का (कर्णाली) र डा. प्रमोद जोशी (सुदूरपश्चिम) निर्वाचित भएका छन् । सचिव पदमा डा. हुलास अग्रवाल विजयी भएका छन् भने कोषाध्यक्षमा डा. तेजुसिंह मल्ल निर्वाचित भए ।

सदस्यमा डा. अमित झा, डा. राकेश साह, डा. पल्पसा श्रेष्ठ, डा. विना श्रेष्ठ, डा. सुमित काफ्ले र डा. शेषराज घिमिरे निर्वाचित भएका छन् । नयाँ कार्यसमितिमा निर्वाचित भएकाहरुले संघको नीति निर्माण, पेसागत हकहित र संगठन विस्तारमा भूमिका खेल्ने अपेक्षा गरिएको छ ।

निर्वाचन काठमाडौं उपत्यकाबाहिर वैशाख ४ र ५ गते तथा काठमाडौं उपत्यकाभित्र वैशाख १७ र १८ गते सम्पन्न भएको थियो । कुल ७१०० मत खसेको यस निर्वाचनमा ‘टिम बन्द्री’, ‘टिम मंगल’ र ‘टिम रिफर्म’ नामका तीन प्यानल प्रतिस्पर्धामा उत्रिएका थिए । नयाँ नेतृत्वले संघभित्र नीतिगत सुधार, चिकित्सकहरूको पेसागत सुरक्षा र स्वास्थ्य क्षेत्रका चुनौती समाधानतर्फ ध्यान दिने प्रतिबद्धता जनाएको छ ।