प्रधान न्यायाधीश शर्माविरुद्धको दरपीठ निवेदन दर्ता

काठमाडौं । सर्वोच्च अदालत प्रशासनले प्रधान न्यायाधीश डा. मनोजकुमार शर्माविरुद्धको दरपीठ निवेदन अन्ततः दर्ता गरेको छ ।

वरिष्ठतम न्यायाधीश सपना प्रधान मल्लले दिएको आदेशपछि प्रशासनले उक्त निवेदनलाई प्रक्रिया अगाडि बढाउँदै दर्ता गरेको हो । जेठ ४ गते दायर गरिएको निवेदनमाथि सुनुवाइका क्रममा न्यायाधीश मल्लले मुख्य रजिष्ट्रार र रजिष्ट्रारका नाममा दिउँसो १ बजेसम्म निवेदन दर्ता गर्न निर्देशन दिएकी थिइन् ।

Advertisement

सो आदेशपछि दुई दिनको ढिलाइपछि सर्वोच्च प्रशासनले निवेदन दर्ता गरेको हो । रिट निवेदक प्रेमराज सिलवालले दायर गरेको उक्त निवेदनको प्रारम्भिक पेसी जेठ ११ गतेका लागि तोकिएको छ ।

यसअघि संवैधानिक परिषद्सम्बन्धी अध्यादेश जारी भएपछि भएको सिफारिस प्रक्रियालाई चुनौती दिँदै सर्वोच्चमा रिट दायर गरिएको थियो । जसअन्तर्गत प्रधान न्यायाधीश पदमा डा. मनोजकुमार शर्माको नाम सिफारिस भएको विषय समावेश छ ।

उक्त रिट सुरुमा प्रशासनिक तहबाट दरपीठ गरिएको थियो भने पछि त्यसविरुद्ध दिइएको निवेदन केही समय ‘होल्ड’मा राखिएको थियो । तर, सर्वोच्च अदालतमा नयाँ प्रधान न्यायाधीशले पदभार ग्रहण गरेलगत्तै निवेदन दर्ता भएको हो । अब यो विषयमा अदालतको नियमित प्रक्रिया अनुसार सुनुवाइ अघि बढ्ने भएको छ ।