कान्स फिल्म फेस्टिभलमा नेपाली फिल्मलाई जुरी पुरस्कार

काठमाडौं । विश्वकै प्रतिष्ठित चलचित्र महोत्सवमध्ये एक मानिने कान्स फिल्म फेस्टिभलमा नेपाली फिल्म ‘एलिफेन्ट्स इन द फग’ले महत्वपूर्ण सफलता हासिल गरेको छ ।

फ्रान्समा सम्पन्न ७९औँ कान्स फिल्म फेस्टिभलअन्तर्गत ‘अन सर्टेन रिगार्ड’ विधामा उक्त फिल्मले ‘जुरी प्राइज’ जित्न सफल भएको हो । क्लोजिङ सेरोमनीमा प्रदान गरिएको यो पुरस्कारलाई कान्सको दोस्रो महत्वपूर्ण सम्मानका रूपमा हेरिन्छ ।

Advertisement

अविनाशविक्रम शाह निर्देशित ‘एलिफेन्ट्स इन द फग’ नेपालको एक गाउँमा बसोबास गर्ने लैंगिक अल्पसंख्यक समुदायको संघर्ष र सामाजिक यथार्थमा आधारित चलचित्र हो । फिल्मले ग्रामीण परिवेश, सामाजिक विभेद र पहिचानको लडाइलाई संवेदनशील ढंगले प्रस्तुत गरेको छ ।

फिल्ममा पुष्पा थिङ, दीपिका यादव, जस्मिन विश्वकर्मा, शान्ति गिरी, गौरी मल्ल, माओत्से गुरुङ, सञ्जय गुप्ता दुरा, महिमा नवबाग तथा आकांक्षा कार्की लगायत कलाकारहरूको अभिनय रहेको छ ।

कान्स फिल्म फेस्टिभलमा आधिकारिक रूपमा छनोट हुने पहिलो नेपाली फिचर फिल्मसमेत बनेको छ । यसअघि निर्देशक शाहकै सर्ट फिल्म ‘लोरी’ले कान्सको ७५औँ संस्करणमा ‘स्पेसल मेन्सन’ अवार्ड जितेर अन्तर्राष्ट्रिय चर्चा बटुलेको थियो ।

सीमित स्रोतसाधन, चुनौतीपूर्ण संघर्ष र स्थानीय कथावस्तुमा आधारित नेपाली फिल्मले विश्वकै प्रतिष्ठित मञ्चमा सम्मान प्राप्त गर्नु नेपाली चलचित्र उद्योगका लागि गौरवपूर्ण उपलब्धि मानिएको छ ।