२०८३ जेष्ठ १७, आइतबार ०९:१६
काठमाडौं । विद्यार्थीमाथि कुटपिट गरेको आरोपमा प्रहरी एक शिक्षकलाई नियन्त्रणमा लिएको छ । मकवानपुरको हेटौँडा उपमहानगरपालिका–७ नागस्वतीस्थित श्री तासिर इङ्लिस सेकेन्डरी बोर्डिङ स्कुलका शिक्षक ४५ वर्षीय अच्युत ओझालाई पक्राउ गरेको प्रहरीले जनाएको छ ।
प्रहरीका अनुसार जेठ ७ गते दिउँसो १२:४० बजेतिर कक्षा ८ मा अध्ययनरत १२ वर्षीय एक विद्यार्थीलाई शिक्षक ओझाले कक्षा कोठामै कुटपिट गरेको आरोप छ। घटनापछि पीडित बालकका अभिभावकले जेठ १६ गते प्रहरी कार्यालय मकवानपुरमा जाहेरी दिएपछि घटना बाहिर आएको हो ।
जाहेरी दिएपछि शिक्षक ओझालाई हेटौँडा–६ पुतली बजारस्थित उनकै घरबाट नियन्त्रणमा लिएको प्रहरीले जनाएको छ। कुटपिटबाट घाइते भएका विद्यार्थीको चितवनस्थित नयाँ मेडिकल कलेजमा उपचार भइरहेको छ। विद्यार्थीको टाउकोमा चोट लागेको र स्वास्थ्य अवस्था मध्यम रहेको प्रहरीले जनाएको छ।
पक्राउ परेका शिक्षकलाई जिल्ला प्रहरी कार्यालय मकवानपुरमा राखी बालबालिकाविरुद्ध कसुर सम्बन्धी मुद्दामा थप अनुसन्धान भइरहेको प्रहरीले जनाएको छ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी
×