मोरङमा म्यानपावर सञ्चालक पक्राउ, रोमानिया पठाइदिने भन्दै लाखौं रूपैयाँ ठगी

विराटनगर । आकर्षक कमाइको प्रलोभन देखाउँदै वैदेशिक रोजगारीका लागि रोमानिया पठाइदिने भनेर सर्वसाधारणसँग ठूलो रकम ठगी गरेको आरोपमा मोरङबाट मेनपावर सञ्चालक पक्राउ परेका छन् ।

मोरङको रतुवामाई नगरपालिका–८ घर भएका ३७ वर्षीय उद्धव पाठकलाई पक्राउ गरिएको मोरङ प्रहरी प्रमुख एसपी कवित कटवालले बताए । उनका अनुसार पाठकले रतुवामाई–८ दाम्राभिट्टामा के एस ए नामक म्यानपावर सञ्चालन गरिरहेको पाइएको छ ।

पाठकसँगै म्यानपावरका लेखापाल रतुवामाई–९ का अन्दाजी २५ वर्षीय अभि भण्डारीलाई पनि प्रहरीले पक्राउ गरेको छ । इलाका प्रहरी कार्यालय सिजुवाका इन्स्पेक्टर कैलाश लिम्बू नेतृत्वको टोलीले दुवै जनालाई सोमबार साँझ पक्राउ गरेको हो ।

पाठक र भण्डारीविरुद्ध ठगी मुद्दा चलाउन मंगलबार अदालतबाट ६ दिनको म्याद थप गरेर अनुसन्धानको बाँकी प्रक्रिया अघि बढाइएको जानकारी एसपी कटवालले दिए । इलाका प्रहरी कार्यालय सिजुवाको हिरासतमा राखेर उनीहरुमाथि प्रहरीले अनुसन्धान गरिरहेको हो ।

‘रोमानिया भन्ने देश पठाउने प्रलोभन देखाएर धेरै सर्वसाधारणसँग लाखौं रूपैयाँ पैसा असुलेको पाइयो । ३–४ वर्षदेखि पैसा लिएर अहिलेसम्म फिर्ता नगरेको पाइयो,’ एसपी कटवालले भने । पाठकलाई लामो समयदेखि प्रहरीले खोजी गरिरहेको थियो ।

प्रहरीका अनुसार उनीविरुद्ध इलाका प्रहरी कार्यालय सिजुवा र उर्लाबारी तथा जिल्ला प्रहरी कार्यालय मोरङसहित काठमाडौंमा पनि किटानी जाहेरी परेको पाइएको छ । रोमानियामै बस्दै आएका कारण पाठक पक्राउ परेका थिएनन् । उनी केही समयअघि मात्रै नेपाल आएको प्रहरीले जनाएको छ ।

‘नेपाल आएर पनि लामो समय काठमाडौंमा बसे । रतुवामाईस्थित घरमा आएको एक साता मात्रै हुँदैछ,’ प्रहरी स्रोतले भन्यो । घरमै आएको विशेष सूचनाका आधारमा खटिएको प्रहरीले पाठकलाई घरबाटै पक्राउ गरेको हो ।

पठाकले सय जनाभन्दा बढी सर्वसाधारणलाई ठगी गरेको प्रहरीको प्रारम्भिक अनुसन्धानबाट पत्ता लागेको छ । एक जनासँग १ लाखदेखि ४ लाख रूपैयाँसम्म असुलेको पाइएको प्रहरीले जनाएको छ । लाखौं रूपैयाँ ठगी गरेर फरार बनेका पाठक बल्ल पक्राउ परेका हुन् ।

उनीविरुद्ध रतुवामाई–७ का नारायणप्रसाद भट्टराई, रतुवामाई–८ का पदमबहादुर खुलाल, कानेपोखरी गाउँपालिका–६ का पुनम नेपाल लगायतले इलाका प्रहरी कार्यालय सिजुवामा जाहेरी दिएका थिए । प्रहरीको प्रारम्भिक अनुसन्धानबाट पाठकले वैदेशिक रोजगारीमा जान चाहनेको खोजी गरेर आफ्नै म्यानपावरका लेखापाल अभि भण्डारीको बैंक खातामा पैसा जम्मा गर्न लगाउने गरेको पाइएको छ ।

‘विदेश जान चाहनेलाई रोमानिया पठाइदिने भन्दै पाठकले म्यानपावरका लेखापाल भण्डारीको खातामा पैसा जम्मा गर्न लगाउँदा रहेछन् । ३–४ वर्षअघि पैसा दिएकाहरुलाई अहिलेसम्म रोमानिया नपठाएको पाइयो,’ प्रहरी स्रोतले भन्यो । म्यापावर सञ्चालक पाठकले कति जनालाई ठगी गरेका थिए भनेर हालसम्म यकिन भइसकेको छैन ।

यद्यपि, प्रहरीले उनीबाट सय जनाभन्दा बढी सर्वसाधारण ठगीमा परेको अनुमान गरेको छ । अनुसन्धान सकिएपछि सबै विषय पत्ता लाग्ने प्रहरीले जनाएको छ ।