कोशी प्रदेश : मन्त्रीसँगको विवादले सचिवको सरुवा

विराटनगर । कोशी प्रदेशका आन्तरिक मामिला तथा कानुन मन्त्री इन्द्रमणी पराजुलीसँग कार्यकक्षमै भनाभन भएपछि मन्त्रालयका सचिव आस्मान तामाङको सरुवा भएको छ । शुक्रबार बसेको प्रदेश मन्त्रिपरिषद् बैठकले सचिव तामाङलाई प्रदेश लोक सेवा आयोगमा काज सरुवा गर्ने निर्णय गरेको हो ।

तामाङको ठाउँमा सहसचिव कृष्णप्रसाद सापकोटालाई मन्त्रालयको जिम्मेवारी दिइएको छ । नयाँ सचिव सापकोटाले शुक्रबार नै मन्त्रालयमा हाजिर भई कार्यभार सम्हालेका छन् । मन्त्री पराजुलीले उनलाई स्वागत समेत गरेका छन् ।

Advertisement

मन्त्रालय स्रोतका अनुसार मन्त्री पराजुली र सचिव तामाङबीच केही समयदेखि सम्बन्ध सुमधुर थिएन । तर, गत सोमबार दुईबीचको तिक्तता उत्कर्षमा पुग्याे । मन्त्रीको कार्यकक्षमै भएको भनाभनका क्रममा मन्त्री पराजुलीले सरकार र मन्त्रीभन्दा कर्मचारी बढी शक्तिशाली भएको आशयको टिप्पणी गरेका थिए ।

मन्त्रीको भनाइको प्रतिवाद गर्दै सचिव तामाङले सरकारको अस्थिरतामाथि कटाक्ष गरेका थिए । उनले सरकार भरे हो कि भोलि हो भन्ने निश्चित छैन, यस्तो बेला अरु के हुन्छ ? भन्दै जवाफ दिएका थिए । मन्त्रीसँगको विवादपछि उनी कार्यकक्षबाट बाहिरिएका थिए । उक्त घटनाका बेला नेपाल पत्रकार महासंघ कोशी प्रदेशका अध्यक्ष भरत खड्का मन्त्रीकै कार्यकक्षमा उपस्थित थिए । उनी पत्रकारहरूको बीमा लगायतका विषयमा छलफल गर्न त्यहाँ पुगेका थिए । कार्यकक्षबाट निस्किएपछि पनि मन्त्री र सचिवबीच फोनमा समेत भनाभन भएको स्राेतकाे दाबी छ ।

त्यस लगत्तै सचिव तामाङ उपसचिव अर्जुन निरौलालाई आर्थिक कारोबार बाहेकका प्रशासनिक जिम्मेवारी सुम्पिएर बिदामा बसेका थिए । सोही विवादको शृङ्खला उनको सरुवामा पुगेर टुङ्गिएको हो ।

शुक्रबारको मन्त्रिपरिषद् बैठकले सचिव सरुवाबाहेक अन्य महत्वपूर्ण निर्णयहरू पनि गरेको छ । बैठकले महालेखा परीक्षकको आठौँ वार्षिक प्रतिवेदन २०८० लाई कोशी प्रदेश सभामा पेश गर्न स्वीकृति प्रदान गरेको छ । यस्तै, प्रदेश सरकारले बहुवर्षीय आयोजनाहरूको स्रोत सहमति सम्बन्धी मापदण्डलाई समेत स्वीकृतिको प्रक्रियामा अगाडि बढाउने निर्णय गरेको छ ।