मदन पुरस्कारको अन्तिम प्रतिस्पर्धामा १० कृति, २९८ पुस्तकबाट छनोट

काठमाडौं । मदन पुरस्कार गुठीले वर्ष २०८२ को मदन पुरस्कारका लागि अन्तिम प्रतिस्पर्धामा रहेका उत्कृष्ट १० पुस्तकहरूको सूची सार्वजनिक गरेको छ ।

गुठीका अध्यक्ष कुन्द दीक्षितले सोमबार जारी गरेको विज्ञप्तिअनुसार यस वर्ष पुरस्कारका लागि प्राप्त २९८ पुस्तकमध्ये मूल्यांकनपछि १० कृतिलाई उत्कृष्ट सूचीमा समावेश गरिएको हो । यही सूचीभित्रबाट एक कृतिलाई वर्ष २०८२ को मदन पुरस्कार प्रदान गरिनेछ ।

Advertisement

उत्कृष्ट सूचीमा केशवराज ज्ञवालीको ‘अज्ञात’, केशव दाहालको ‘इथा’, ललित विष्टको ‘उत्कर्ष’, रोशनकुमार झाको ‘नेपालमण्डलसँग जोडिएको सिम्रौनगढको इतिहास’ तथा वीणा जोशी (राजभण्डारी)को ‘नेवार समुदायका परम्परागत मुकुन्डोनाच’ छनोट भएका छन् । यस्तै, उमा सुवेदीको ‘परिधि’, सीमा आभासको ‘महायुग’, श्रवण मुकारुङको ‘सलह’, डा. नवराज केसीको ‘स्वस्पर्श’ र नदीशको ‘हिउँद’ पनि उत्कृष्ट १० कृतिको सूचीमा परेका छन् ।

मदन पुरस्कार गुठीले विक्रम संवत २०७२ सालदेखि पुरस्कारका लागि प्राप्त पुस्तकहरूमध्ये उत्कृष्ट १० कृतिको सूची सार्वजनिक गर्ने परम्परा सुरु गरेको हो । गुठीका अनुसार छनोटका क्रममा अप्रकाशित सामग्रीको मौलिकता र कृतिको सिर्जनात्मक योगदानलाई विशेष प्राथमिकता दिइन्छ ।

विक्रम संवत २०१२ सालमा स्थापित मदन पुरस्कार पहिलो पटक २०१३ सालमा प्रदान गरिएको थियो । पहिलो संस्करणमा सत्यमोहन जोशीको ‘हाम्रो लोक संस्कृति’, चित्तरञ्जन नेपालीको ‘जनरल भीमसेन थापा र तत्कालीन नेपाल’ तथा बलराम जोशीको ‘अधिकविभव स्थिरविद्युत् उत्पादक’ पुरस्कृत भएका थिए ।

विक्रम संवत २०७५ सालदेखि मदन पुरस्कारको राशी चार लाख रुपैयाँ कायम छ। नेपाली साहित्यकै प्रतिष्ठित पुरस्कारका रूपमा चिनिने मदन पुरस्कारको अन्तिम विजेताको घोषणा भने गुठीले पछि गर्ने जनाएको छ।